Израел вели дека го интензивира нападот врз Хезболах како одговор на зголемувањето на нападите со беспилотни летала и ракети од страна на групата поддржана од Иран, врз израелските трупи во Либан и врз пограничните заедници
Израелската војска го зазеде стратешкиот замок Бофорт во јужен Либан, што за премиерот Бенјамин Нетанјаху значи „одлучувачка промена“ во својата офанзива против Хезболах.
Ова се случува во време кога копнените трупи се движат сè подлабоко на либанската територија, надвор од нивната оригинална линија на демаркација на реката Литани.
Израелските одбранбени сили (ИДФ) ја проширија зоната во јужен Либан од која ги предупредија жителите да се евакуираат.
Премиерот на Либан го обвини Израел за спроведување „колективна казна“.
Сместен над долината Литани, замокот Бофорт е клучен за контрола на регионот околу него уште од времето кога крстоносците го изградиле пред околу 900 години. Израелската армија го зазеде пред 44 години во она што во Израел е познато како Прва либанска војна.
Во изјава по неговото заземање, Нетанјаху рече дека тоа е одлучувачка фаза и одлучувачка промена во нивната политика.
„Ја пробивме бариерата на стравот. Преземаме иницијатива, дејствуваме на сите фронтови – во Сирија, во Газа, во Либан“,
рече тој.
Нетанјаху додаде дека неговата цел е „да ја продлабочи и прошири контролатa врз места што биле под контрола на Хезболах“.
Министерот за одбрана Израел Кац се потсети на битката пред 44 години против Палестинската ослободителна организација – една од првите во либанската војна. Сега, израелската бригада повторно го подигна израелското знаме таму. Ова е многу симболична, како и стратешка победа за Израел.
Во 1982 година, израелските сили го окупираа замокот – кој е оддалечен само 14,5 километри од израелската граница, но го напуштија во 2000 година кога се повлекоа од нивната самопрогласена тампон-зона во јужен Либан.
За Либанците, тоа е најновото историско обележје што беше заземено во последниве денови, додека градот Набатија, подалеку на север, се чини дека е сè повеќе цел на ИДФ.
Кац рече дека контролата врз замокот и гребенот на кој се наоѓа е важен чекор во заштитата на израелските заедници од другата страна на границата.
Инаку, најновото предупредување за евакуација е второ по ред во последните денови, со кое Израел ги известува жителите да го напуштат целиот јужен Либан под реката Захрани.
„Секој што е присутен во близина на елементи, објекти или средства за борба на Хезболах го загрозува својот живот“, рече портпаролот на ИДФ. Тој вели дека „значаен број копнени војници на ИДФ“ биле вклучени во операцијата, која „моментално се проширува на дополнителни области“.
Израел вели дека го интензивира својот напад врз Хезболах како одговор на зголемувањето на нападите со беспилотни летала и ракети од страна на групата поддржана од Иран, врз израелските трупи во Либан и врз заедниците преку границата.
Министерството за здравство на Либан соопшти дека 13 лица – болнички персонал биле повредени во воздушен напад во близина на болницата Хирам во Тир, јужен Либан.
Војската потврди дека уште еден војник е убиен, додека училиштата во заедниците на израелската страна од границата беа затворени како мерка на претпазливост.
Во саботата, Хезболах испука околу 25 проектили кон таа област, што предизвика повици од опозициските израелски политичари владата да стори повеќе за да ја обезбеди безбедноста на жителите.
Во Либан, премиерот Наваф Салам одржа телевизиско обраќање во кое го обвини Израел за „политика на изгорена земја и колективно казнување“ на југот од земјата.
И Франција, која има историски врски со Либан, побара состанок на Советот за безбедност на Обединетите нации за да се разговара за израелските воени операции.