Премиерот, од денешното чествување на сесловенските просветители Кирил и Методиј во Охрид, порача дека Македонија се соочува со неправедна блокада кон Европската Унија и упати критики кон домашните политичари кои, според него, делуваат како застапници на туѓи интереси
Македонија се соочува со сериозна и неправедна блокада во евроинтеграциите, но мора да стане дел од Европската Унија задржувајќи го своето достоинство, рече премиерот Христијан Мицкоски во говорот на свечената академија по повод Денот на сесловенските просветители, одржана во црквата „Света Софија“ во Охрид.
Во своето обраќање, тој нагласи дека може да ги разбере, но не и да ги оправда позициите на Бугарија, додавајќи дека цврстината и обединетоста на граѓаните се клучни за надминување на историските искушенија и удари со кои се соочува државата.
„И да кажам дека нема пари, нема моќ и нема причина поради која би го предал мојот народ или би направил нешто, било што, на негова штета“,
рече тој.
Говорејќи за внатрешната политичка состојба, Мицкоски истакна дека направил сè за да подаде рака на опозицијата, но и оти тие ја испуштиле секоја шанса за заедничко делување за националните интереси. Според премиерот, тоа што некои се лидери на политички партии не значи дека автоматски се лидери и на својот народ, предупредувајќи дека со одбивањето да се обединат околу клучните прашања, тие стануваат маргинални служители на туѓи интереси и се осудени на пропаст.
„Не можам да ги разберам, ниту оправдам, домашните политичари кои делуваат како специјални пратеници на премиерот на соседната држава. Тоа што тој го зборува, тоа го зборуваат и домашните политичари и нивни претставници. Поразително. Тоа нè поразува и како нација. Имаме отсуство кај дел од луѓето на чувство за припадност кон својот народ и подготвеност со гордост да го носат она што јас го велам – мекото ткиво на македонскиот народ“,
изјави Мицкоски.
Тој го оцени овој момент како последна шанса за Македонија која мора да се искористи на здрава основа, најавувајќи дека ќе го мотивира секого што сака да се вклучи во процесот за напредок на државата.