Димитриеска-Кочоска во објава на нејзиниот официјален профил на Фејсбук, прави паралела помеѓу состојбата во јавните финансии за време на претходната власт додавајќи оти во јуни 2024 година државната каса била оставена во исклучително тешка состојба
Министерката за финансии, Гордана Димитриеска-Кочоска, упати јавен повик до економскиот тим на опозициската СДСМ на заедничка средба во Министерството, со цел, како што вели, да се разјаснат економските состојби со реални бројки, наспроти „хистеричните прес-конференции полни со невистини“.
Според министерката, опозицијата изнесува погрешни толкувања и паника во јавноста, иако официјалните економски показатели покажуваат стабилност и раст.
Димитриеска-Кочоска во објава на нејзиниот официјален профил на Фејсбук, прави паралела помеѓу состојбата во јавните финансии за време на претходната власт додавајќи оти во јуни 2024 година државната каса била оставена во исклучително тешка состојба.
Таа вели дека просечниот раст од 2017 до 2024 година изнесувал околу 1,8 отсто, додека во изминатите шест квартали економијата расте со околу три проценти, во услови кога растот во ЕУ е околу еден процент. Во 2025 година министерката вели дека македонската економија бележи раст од 3,5 отсто.
Според неа, од 4,78 милијарди евра во 2017 година, јавниот долг речиси се удвоил до вториот квартал од 2024 година, достигнувајќи близу девет милијарди евра.
„Во моментов платите растат со динамика близу 10 отсто, бројот на нововработени лица расте. Капиталните инвестиции се реализираат на историски високо ниво. Ова не се бројки од партиски штаб. Ова се реални економски показатели“,
пишува Димитриеска-Кочоска.
Министерката потенцираше дека најголемиот предизвик на сегашниот тим е истовремено да го финансира развојот и да ги враќа старите долгови создадени во време на СДСМ.
„Од 2026 до 2031 година државата има обврска да сервисира околу 9 милијарди евра по основ на главнина и камати од стари долгови. Само од втората половина на 2024 година до првиот квартал од 2026 година, обезбедивме 1,2 милијарди евра исклучиво за сервисирање на еврообврзници земени од претходната власт“,
кажа Димитриеска-Кочоска.
Таа додаде дека минатата година била исплатена еврообврзница од 500 милиони евра, а во тек е сервисирањето на следната еврообврзница од 700 милиони евра, чија втора половина од обврската доспева во текот на идниот месец.
Вели дека секој чекор се прави врз основа на сериозни анализи и домаќинско работење и оти нема импровизација.
Димитриеска-Кочоска рече дека како Влада навремено ги презеле сите потребни мерки за стабилизација на пазарот и заштита на стандардот на граѓаните. Додава дека денес имаме меѓу најниските цени на горивата во регионот, што, според неа, е резултат на одговорни и навремени политики.
„Затоа, пред следната прес-конференција, ги замолувам добро да ги проверат информациите што им ги подготвуваат советниците. Податоците се јавно достапни на веб-страницата на Министерството за финансии. Ако не успеваат, јас и мојот тим стоиме целосно на располагање“,
додава министерката.
Објавата на министерката доаѓа откако денеска лидерот на СДСМ, Венко Филипче, на прес-конференција рече дека буџетот е пред колапс и нема пари за повисоки плати, пензии и антикризни мерки. Тој ја оцени состојбата во економијата како сериозно влошена и ја обвини Владата предводена од Христијан Мицкоски дека не успеала да обезбеди подобар животен стандард за граѓаните.