Интеграцијата на Западниот Балкан, рече таа, не е само политичко, туку и безбедносно прашање, и во тој контекст, наведе дека за да се биде отпорен на туѓи влијанија не е доволна само реториката бидејќи, според неа, на сите им е познато оти не постои политички вакуум што некој нема да се обиде да го пополни, или да влијае на него
„Иднината на Северна Македонија е во Европската Унија. Ги поздравуваме досегашните реформски напори на државата и нивното усогласување со безбедносната политика. Знаеме дека се тешки чекорите за пристапните разговори, но ѝ нудиме поддршка на Македонија“, рече словенечката претседателка Наташа Пирц-Мусар, која денеска ја пречека и имаше средба со својата македонска колешка во Љубљана
За нас Европската Унија (ЕУ) беше и останува не само географски, историски, заеднички културен дом, туку и важен приоритет. И очекуваме, како и досега, поддршка од Словенија на овој пат. Ова денеска на заедничката прес-конференција со нејзината словенечка колешка го кажа претседателката Гордана Сиљановска-Давкова, која деновиве е во официјална посета на Љубљана.
Прес-конференцијата уследи по пречекот со воени и државнички почести на Сиљановска-Давкова и и тет-а-тет разговорот што таа ги имаше со Наташа Пирц-Мусар, како и средбата меѓу македонската и словенечката делегеција.
Осврнувајќи се на евроинтегративниот пат на земјава, претседателката Сиљановска-Давкова кажа дека уште еднаш сака да укаже на опасноста од билатерализација на процесот на проширување, особено кога тоа е поврзано со идентитетските прашања, за кои, како што кажа, не се преговара.
„Ние не бараме привилегии, туку доследна примена на европското право и почитување на историскиот и културниот идентитет на народите и дигнитетот и интегритетот на индивидуите. Европската Унија персонифицира единство на различностите. ЕУ останува инспиративна филозофија ако си ги почитува вредностите и принципите“,
рече македонската претседателка.
Интеграцијата на Западниот Балкан, рече таа, не е само политичко, туку и безбедносно прашање, и во тој контекст, наведе дека за да се биде отпорен на туѓи влијанија не е доволна само реториката бидејќи, според неа, на сите им е познато дека не постои политички вакуум што некој нема да се обиде да го пополни, или да влијае на него.
Балканот, кажа Сиљановска-Давкова, секогаш бил своевиден лакмус за одмерување на силите на важните актери.
Говорејќи за Македонија, таа наведе дека земјава има 100 отсто усогласена надворешна безбедносна политика со ЕУ, и дека заслужуваше низ призма на Копенхашките критериуми да покажеме зрелост и заинтересираност за европскиот пат.
Сиљановска-Давкова: Словенија е моја втора дежела
Инаку, на почетокот на своето обраќање, Сиљановска-Давкова истакна дека оваа нејзина официјална посета на Словенија се реализира во година кога и двете држави одбележуваат 35 години независност. Таа напомена и дека посетата за неа има лична димензија, бидејќи нејзиното докторско академско искуство е врзано за Љубљана.
„Затоа, напати велам дека Словенија ја нарекувам како моја втора дежела“,
рече македонската претседателка.
Таа посочи оти е неспорно дека Словенија е наша пријателска држава, но исто така, како што рече Сиљановска-Давкова, таа е и инспиративен пример на мала европска држава, која со стабилни демократски институции, владеење на правото и партиципативна политичка култура, успешно гради функционално и интегрирано општество.
„Денеска потврдивме дека билатерални односи се одлични, но има потенцијал за продлабочување на соработката во економијата, образованието, науката, културата и туризмот. Посебно внимание ѝ посветивме на потребата и можноста од зголемената трговска размена, имајќи предвид дека Словенија и сега е еден од нашите најзначајни инвеститори, особено во енергетиката и зелената транзиција. Сакам да потенцирам дека директната авионска линија Скопје – Љубљана, со којашто допатував, дополнително ќе придонесе за релативизирање на далечината, односно за зголемување на близината“,
рече Сиљановска-Давкова.
Таа се осврна на македонските студенти кои своето академско усовршување го продолжуваат во Словенија, и за македонската заедница чија слобода на организирање е уште еден доказ за словенечката демократска зрелост и почитување на културната различност.
Со Пирц-Мусар разговарале и за соработката во рамките на Западниот Балкан, при што македонската претседателка, со задоволство, како што кажа, прифатила да помогне во Процесот Брдо Бриони, бидејќи самото постоење на овој процес, рече, сведочи за посветеноста на Словенија и Хрватска на регионот.
Пирц-Мусар: Иднината на С Македонија е во ЕУ
Словенечката претседателка на прес-конференцијата кажа дека на средбата со својата колешка најмногу се задржале и најмногу време одвоиле на европската иднина на Северна Македонија. Во тој контекст, Пирц-Мусар рече дека Словенија останува цврст и искрен поддржувач на проширувањето на Европската Унија со земјите од Западен Балкан.
„Веруваме дека проширувањето значи поголема безбедност, поголема политичка стабилност на регионот, побрз развој на државите од Западен Балкан и појака и поповрзана Европа. Иднината на Северна Македонија е во Европската Унија. Ги поздравуваме досегашните реформски напори на државата и нивното усогласување со безбедносната политика. Знаеме дека се тешки чекорите за пристапните разговори, но ѝ нудиме поддршка на Македонија. Словенија и во иднина ќе ѝ стои на располагање на Северна Македонија со пренос на знаење и техничка помош, особено во областите на реформи во јавната администрација и јавните финансии“,
рече Пирц-Мусар.
Според неа, денешните разговори потврдиле дека меѓу државите постои големо ниво на доверба и заедничка желба за натамошно продлабочување на одличните билатерални односи.
„Посебно внимание во разговорите посветивме на економската соработка. Македонија останува важен и перспективен партнер на словенечкото стопанство, словенечката економија. Вкупната трговска размена во 2025 година достигна 442 милиони евра, што го потврдува позитивниот тренд за натамошен пораст. Големи можности гледаме, пред сè, во земјоделството, обновливите извори на енергија, дигитализацијата, еко и бањскиот туризам. За натамошно зајакнување на економската соработка, клучно е да се обезбедат стабилна и предвидлива деловна средина на двете страни, правна сигурност на инвеститорите, ефикасна и правична административна и судска постапка, како и транспарентна регулаторна рамка“,
напомена словенечката претседателка.
На средбата станало збор и за состојбите во регионот, како и за пошироките меѓународни прашања.
„Се согласивме дека дијалогот, почитувањето на меѓународното право и конструктивните односи меѓу државите се клучни за мирот, стабилноста и развојот. Словенија доследно се залага за почитување на меѓународното право и принципите на повелбата на Обединетите нации. Во таа насока, го нагласив значењето на транспарентниот и ексклузивен процес за избор на нов генерален секретар на Обединетите нации. Овој избор е од особено значење, бидејќи гледаме силна меѓународна поддршка да се избере жена за генерален секретар. Се согласивме дека навистина е крајно време во богатата, повеќе од 80 години долга историја на Обединетите нации, конечно да се случи и тоа – во својот прв говор да ни се обрати госпоѓа генерална секретарка на оваа организација“,
рече Пирц-Мусар.
Во рамките на посетата, Сиљановска-Давкова ќе оствари средба и со претседателот на Државниот збор на Република Словенија, Зоран Стевановиќ. Предвидено е претседателката да положи венец пред Споменикот на жртвите од сите војни и жртвите поврзани со војните. Таа вчера ја посети Македонската православна црква „Св. Климент Охридски“ во Љубљана и оствари средба со членовите на Сојузот на македонските културни друштва и Црковните одбори. Се сретна и со македонски иселеници кои работат во областа на науката, културата, медицината.
Претседателката Сиљановска-Давкова вчера попладне одржа состанок со членовите на Македонско-словенечкиот бизнис-клуб, додека во Крањ го посети Македонското културно друштво. Утре ќе одржи предавање на Правниот факултет во Љубљана на тема: „Уставни трансформации на патот кон ЕУ: Реформи или уставен инженеринг?“.