Средбата доаѓа еден ден откако копретседателите на Влен, Меџити и Касами, на своите фејсбук-профили објавија дека испитот за правосудство наскоро ќе се полага на албански јазик
Изнаоѓањето решение за употребата на јазиците при полагањето на правосудниот испит било тема на денешната средба на претседателот на Владата, Христијан Мицкоски, со копретседателите на коалицијата Влен, Биљал Касами и Изет Меџити.
На средбата, како што се наведува во соопштението од владината прес-служба, било потенцирано дека патот до напредок и меѓусебна доверба води преку заеднички, мудар и достоинствен пристап. Соговорниците се согласиле дека образованието и знаењето се темелите на кои треба да се гради секоја современа држава.
На средбата било заклучено дека институциите веќе активно работат на модел кој ќе биде целосно усогласен со Уставот и со Законот за употреба на јазиците, а насочен кон обезбедување правна сигурност и функционалност на системот.
„Само преку заедничко чекорење и почитување на законите можеме да дојдеме до решенија кои значат долгорочна стабилност и функционални институции“,
се додава во соопштението.
Средбата доаѓа еден ден откако копретседателите на Влен, Меџити и Касами, на своите фејсбук-профили објавија дека испитот за правосудство наскоро ќе се полага на албански јазик.
Инаку, за денеска во 16:30 часот албански студенти најавија дека ќе протестираат пред Камениот мост и ќе бараат спроведување на правосудниот испит на албански јазик.
„Обединете се со студентите – сите заедно“, е слоганот на протестот. Ова е втор протест организиран од албански студенти и доаѓа како резултат на отфрлањето на нивното барање од страна на министерот за правда.
Околу прашањето за полагањето на правосудниот испит на албански јазик, Демократската унија за интеграција (ДУИ) во февруари годинава поднесе кривична пријава против министерот за правда, обвинувајќи го за прекршувања на Уставот и законите.
Од ДУИ тогаш рекоа дека причина за кривичната пријава е одбивањето на Министерството да организира правосуден испит на албански јазик. Според партијата, со ова директно се кршат членот 7 од Уставот и членовите 1, 2, 3 и 9 од Законот за употреба на јазиците, кои го признаваат албанскиот јазик како службен јазик покрај македонскиот и ги обврзуваат државните институции да обезбедат употреба на службениот јазик на странките во службените постапки и документи.
Од ДУИ потенцираа дека државните институции се законски обврзани да обезбедат службените процеси и документи да се спроведуваат и на јазикот што го зборуваат најмалку 20 отсто од граѓаните.
Министерот за правда Игор Филков тогаш рече дека во Министерството била разгледана петиција поднесена од студентите во врска со полагањето на правосудниот испит на албански јазик, при што внимателно биле анализирани сите релевантни уставни и законски одредби.
Тој додаде дека Законот за употреба на јазиците овозможува употреба на албанскиот јазик како службен јазик во постапките пред институциите, но неговата примена не може да се разгледува изолирано од другите системски закони што го уредуваат функционирањето на правосудството.
Неговата тогашна објава на Фејсбук следуваше како реакција на изјавите на вицепремиерот Беким Сали за полагањето на правосудниот испит на албански јазик.
За преписките помеѓу Филков и Сали и за полагањето на правосудниот испит на албански јазик, премиерот Христијан Мицкоски повикувајќи се на амандманот V oд Уставот, рече дека правосудниот испит може да се полага и на албански јазик, но претходно тоа треба да биде утврдено со закон. Актуелниот закон, како што кажа Мицкоски, не го дозволува тоа.