Пловниот објект без екипаж го пронашле локални рибари, а грчката крајбрежна стража го одвела во пристаништето во гратчето Василики. Грчките медиуми пишуваат дека дронот носел експлозив и дека неговиот мотор сè уште работел во моментот кога бил пронајден
Грчката војска истражува случај со пронајден мистериозен поморски дрон без екипаж што локални рибари го забележале во Јонското Море, објави Би-би-си. Пловниот објект бил пронајден во четвртокот во пештера во близина на островот Лефкада, по што била известена крајбрежната стража што го одвела пловилото до блиското пристаниште Василики. Истрагата сега ја води грчкото Министерство за одбрана.
Грчките медиуми пишуваат дека дронот носел експлозив и дека неговиот мотор сè уште работел во моментот кога бил откриен. Во некои новинарски извештаи пишува дека пловилото би можело да биде од украинско производство или поврзано со тековната војна меѓу Русија и Украина.
На социјалните мрежи се појавија снимки на кои се гледа како брод на грчката крајбрежна стража го насочува пловниот објект, долг неколку метри, кон пристаништето. Објектот е со темна боја и со отворен горен капак. На видеото не се гледаат видливи ознаки што би можеле да помогнат за да се идентификува неговото потекло.
Грчки воени експерти сега ќе работат на утврдување на можната намена на дронот и дали тој завршил во грчките територијални води поради технички дефект или губење на комуникацијата со контролниот центар.
Една од верзиите објавена во грчките медиуми е дека дронот можеби бил подготвен за напад против руската „флота во сенка“ – термин што се однесува на стотици танкери што транспортираат нафта и гас за Москва за да ги заобиколат западните санкции воведени по инвазијата на Украина во 2022 година.
Грчкиот весник „Та Неа“ пишува дека пловниот објект наликува на украинскиот дрон „Магура В5“ што досега беше ефикасно користен во повеќе наврати. Но, ова не е независно потврдено.