Премиерот рече дека би сакал изборите да се одржат во својот редовен термин во 2028 година, што според него, е наскоро. Во однос на тоа дали 2027 година е опција за избори, кои во случајот би биле предвремени, Мицкоски рече дека неговата ВМРО-ДПМНЕ е секогаш подготвена да оди на избори и, како што рече, да победи
Оваа година нема да има избори – изјави денеска премиерот Христијан Мицкоски, прашан да ја прокоментира и дообјасни својата вчерашна изјава во која ја најави можноста за нов изборен циклус набрзо.
Мицкоски рече дека 2026 година е реформска и година за консолидација и дека избори сега не се планирани.
„Мојот став го знаете, а тоа е дека оваа година нема да има избори, оваа година е реформска и година на консолидирање. Би сакал да имаме редовни избори што ќе се случат наскоро, во пролетта 2028 година“,
изјави Мицкоски одговарајќи на новинарски прашања.
Во однос на тоа дали 2027 година е опција за избори, кои во случајот би биле предвремени, премиерот рече дека неговата ВМРО-ДПМНЕ е секогаш подготвена да оди на избори и, како што рече, да победи.
„Но она што ние сега го правиме и што е наш фокус е да испорачаме реформи и да ја зголемиме економската активност, со што ќе го зголемиме и стандардот на граѓаните“, вели тој.
На новинарско прашање која беше целта со неговата вчерашна изјава, премиерот рече:
„Па наскоро мора да има избори, такви се законите, на секои четири години има избори“.
Мицкоски рече дека ги следи реакциите на партиите во врска со неговата вчерашна изјава, оценувајќи дека дел од политичките субјекти се исплашиле.