Градоначалникот на Општина Карпош, Стефан Богоев, успеал да си ја поврати фан-страницата на Фејсбук која беше хакирана пред два дена.
Од неговиот кабинет велат дека според известувањето кое го добиле од Фејсбук преземањето на страницата било преку ИП адреси регистрирани во Индонезија, што не значи дека хакерите физички се наоѓаат таму.
За враќањето на фан-страницата извести и Богоев.
„Повторно е активна оваа страница. Комуникацијата ја продолжуваме тука. Ви благодарам за разбирањето и трпението. Имам прилично нови пораки и коментари, за кратко ќе бидат разгледани и одговорени“,
објави Богоев.
Во средата тој во изјава за „360 степени“ рече дека кога се случил хакерскиот напад на фан-страницата му се покажале како администратори два италијански профили. Пред губењето на страницата, тогаш имало и организирано пријавување на негова објава за адреналинскиот парк во Карпош како лажна вест.
„Јас се сомневам во некој или некои на кои им смета работата на Општина Карпош, а очигледно им смета и адреналинскиот парк. Не верувам дека двете работи случајно се совпаднале. Дали на некој му смета паркот бидејќи повеќе сака да гради или се во прашање политички елити, не можам да кажам. Можеби хакирањето е заеднички интерес и на едните и на другите“,
рече тогаш Богоев во дел од изјавата.
Тој случајот тогаш го пријави до Владата и МВР, а најави и дека извести и Амбасадата на САД, како и делегацијата на ЕУ во Скопје.
Истата „судбина“ ги снајде и фан-страниците на претседателот на СДММ, Дарко Каевски и на општинската организација на Карпош – ОО СДСМ Карпош, кои засега не се вратени.