Суровата нафта „брент“ падна за 14,4 отсто на 93,48 долари за барел. Сепак, цените остануваат далеку над нивото од пред почетокот на војната, кога „брент“ се тргуваше под 73 долари за барел
Цените на нафтата паднаа за речиси 15 отсто, а глобалните берзи нагло пораснаа откако САД и Иран се согласија за двонеделен прекин на огнот.
Цената на нафтата веднаш падна, иако не е сигурно дека САД ќе го прифатат предлогот од 10 точки што го состави Иран, пишува „Гардијан“.
Суровата нафта „брент“ падна за 14,4 отсто на 93,48 долари за барел. Сепак, цените остануваат далеку над нивото од пред почетокот на војната, кога „брент“ се тргуваше под 73 долари за барел.
Денеска, како што пишува „Гардијан“, европските берзи се засилија кога започна тргувањето. Паневропскиот индекс Stoxx 600 доби 3,6 отсто и е на пат кон својот најголем еднодневен пораст за една година.
Скок е забележан и кај акциите за патувања и рекреација, при што акциите на „Луфтханза“ скокнаа за 11,5 проценти, на сопственикот на „Бритиш ервејвс“, IAG, пораснаа за 9 отсто, а туристичката група TUI доби 11,6 проценти.
Во Лондон, индексот FTSE 100 порасна за 2,5 отсто, односно за 255 поени на 10 605 поени, што е највисоко ниво од почетокот на војната во Иран.
Сепак, како што се додава, акциите на нафтените компании паднаа, при што акциите на BP паднаа за 7,5 отсто, а на Shell за 6,8 проценти.
Цените на златото пораснаа за повеќе од 2 проценти на 4 812 долари за унца. Криптовалутите исто така се зголемија, при што биткоинот порасна за 2,9 отсто на 71 327 долари, а етерот се искачи за 5,6 проценти на 2 234 долари.
На цената на нафтата влијаеше затворањето на Ормускиот Теснец, поради што снабдувањето од Блискиот Исток беше сериозно нарушено.
Синоќа американскиот претседател Доналд Трамп соопшти дека го прифаќа предлогот на Пакистан и ќе ги суспендира заканите за бомбардирање на енергетската инфраструктира и мостовите во Иран за две недели. Иран вели дека формално се согласува на прекин на огнот и отворање на Ормускиот Теснец доколку престанат нападите.
Иранскиот министер за надворешни работи Абас Арагчи вели дека во период од две недели, безбедното минување низ Ормускиот Теснец ќе биде можно.