Според него, една година по трагедијата, здравствениот систем продолжува да ги сумира поуките, искуствата и системските предизвици
Министерот за здравство Азир Алиу денеска на Меѓународната конференција посветена на институционалните и клиничките аспекти и решенија една година по пожарот во Кочани упати благодарност до повеќе од 400 здравствени работници од јавниот и приватниот сектор, кои, како што рече, со исклучителна пожртвуваност, концентрација и професионализам направија натчовечки напори да спасат животи.
„Вашата професионалност, солидарност и хуманост ќе останат длабоко запаметени. Во мигови кога секоја минута значеше надеж, вие бевте вистински партнери во борбата за секој човечки живот“,
вели тој.
Според него, една година по трагедијата, здравствениот систем продолжува да ги сумира поуките, искуствата и системските предизвици.
Министерот им се заблагодари и на медицинските тимови во европските здравствени центри, каде беа сместени дел од повредените во пожарот, оценувајќи дека меѓународната солидарност потврдила дека стручноста и хуманоста немаат граници кога се спасуваат човечки животи.
„Благодарение на воспоставената интероперабилност, 115 пациенти беа безбедно упатени на лекување во европски клиники. Во услови кога секоја одлука мораше да биде брза и прецизна, затоа што беше од животно значење, институциите делуваа усогласено и одговорно“,
кажа министерот.
Зборувајќи за долгорочните последици од трагедијата, рече дека покрај физичките повреди, кај повредените, нивните семејства, но и во заедницата, остануваат и психилошкитее траги.
Затоа, додаде дека психолошката и психо-социјалната поддршка е составен дел од здравствениот одговор.
Во обраќањето заклучи дека оваа трагедија ја откри потребата за дополнително јакнење на капацитетите во третманот на тешки изгореници, масовни несреќи и долготрајна рехабилитација.
„Најголемата обврска кон жртвите и повредените е континуирано унапредување на здравствениот систем“,
рече Алиу.
Посочи дека во деновите кога се случи трагедијата не бил министер, но како човек и како граѓанин ја следел оваа болка со чувство на немир и тага.
„Денес, како министер, кога ги слушам личните сведоштва за пожртвуваноста на лекарите, медицинските сестри, техничарите, возачите, односно сите кои биле вклучени, уште подлабоко разбирам за големината на силата, знаењето и смиреноста кои биле потребни во тие мигови. Тие сведоштва ми создадоа лична и професионална обврска како министер да работам овие сеќавања да ги претвориме во трајна институционална подготвеност на здравствениот систем“,
додаде министерот.
Посебна вредност на оваа конференција, е присуството на 37 лекари и медицински експерти од странство, што во најтешките денови по трагедијата во Кочани директно учествуваа во лекувањето на пациентите.