Објавата доаѓа еден ден откако Секретаријатот за енергетика на САД соопшти дека Соединетите Американски Држави ќе ослободат 172 милиони барели нафта од своите стратегиски резерви на нафта во обид да ги ограничат зголемените цени на нафтата поради војната во Иран
Соединетите Американски Држави (САД) издадоа 30-дневна дозвола за купување руска сурова нафта и нафтени деривати што во моментов се на море, што, според за американскиот секретар за финансии Скот Бесент, е чекор кон стабилизирање на глобалните енергетски пазари погодени од војната со Иран.
Одлуката на САД, објавена синоќа, доаѓа неколку часа откако референтните цени на нафтата се искачија над 100 долари за барел, што е највисоко ниво во последните четири години. Според Бесент, ваквиот потег нема да обезбеди значителна финансиска корист за руската влада, која средствата од продажба на нафта и гас ги користи за финансирање агресијата врз Украина.
„Оваа тесно приспособена, краткорочна мерка се однесува само на нафтата што веќе е во транзит и нема да обезбеди значителна финансиска корист за руската влада, која најголемиот дел од своите приходи од енергија ги добива од даноците што се пресметуваат на местото на екстракција“,
вели американскиот секретар за финансии.
Објавата доаѓа еден ден откако Секретаријатот за енергетика на САД соопшти дека Соединетите Американски Држави ќе ослободат 172 милиони барели нафта од своите стратегиски резерви на нафта во обид да ги ограничат зголемените цени на нафтата поради војната во Иран. Станува збор за дел од пошироката обврска на Меѓународната агенција за енергетика, која брои 32 земји, да ослободи 400 милиони барели нафта од своите резерви.
Дозволата од четврток, која овозможува испорака и продажба на руска сурова нафта и нафтени производи натоварени на бродови од 12 март, ќе остане важечка до полноќ на 11 април, според вашингтонско време, се наведува во текстот објавен на веб-страницата на американскиот секретаријат за финансии.
Американската администрација претходно на 5 март издаде 30-дневно ослободување наменето само за Индија, со што му дозволи на Њу Делхи да купува руска нафта што се чува на море.
Нападите на САД и Израел врз Иран и последователниот одговор на Техеран ги ескалираа регионалните тензии и го парализираа превозот низ Ормускиот Теснец, нарушувајќи ги виталните текови на нафта и гас на Блискиот Исток и зголемувајќи ги цените на енергенсите на светските пазари.
Иранскиот корпус на Исламската револуционерна гарда објави блокада на испораките на нафта од Заливот додека не престанат нападите на САД и Израел.