Во обраќањето на седницата на ЕСС, премиерот Христијан Мицкоски рече дека информацијата за висината на минималната плата за 2026 година, која е усогласена согласно законот, се очекува утре да биде усвоена на владина седница
Минималната нето-плата во Македонија од овој месец се зголемува за 1 667 денари и ќе изнесува точно 26 046 денари, потврди денеска министерот за економија и труд, Бесар Дурмиши.
По седницата на Економско-социјалниот совет (ЕСС), министерот Дурмиши појасни дека зголемувањето од 6,86 отсто е резултат на законската формула која ги следи економските движења од изминатата година.
„Го утврдивме растот на минималната плата согласно член 4 од Законот за минимална плата. Усогласувањето на минималната плата секоја година во март се врши врз основа на јасно утврдена формула и тоа: 50 проценти од порастот на просечната исплатена нето-плата од минатата година и 50 проценти од порастот на индексот на трошоците за живот според официјалните податоци на Државниот завод за статистика“,
кажа Дурмиши.
Според објавените податоци за претходната година, Дурмиши рече дека просечно исплатената нето-плата бележи пораст од 9,6 отсто, додека индексите на трошоците за живот изнесуваат 4,1 проценти.
Пресметувајќи според законската формула, Дурмиши рече дека тоа значи 4,8 проценти од порастот на платите и 2,05 проценти од порастот на трошоците за живот, односно вкупно усогласување за минималната плата е зголемување за 6,86 отсто.
Со ова усогласување, додаде тој, минималната плата која во 2025 година изнесувала во бруто-износ 36 037 денари, за 2026 година ќе изнесува 38 507 денари, односно 26 046 денари во нето-износ. Тоа, кажа министерот, претставува зголемување од 2 470 денари во бруто или 1 667 денари во нето-износ.
„Ова е системско и законско утврдено решение кое обезбедува раст на минималната плата согласно економските движења, штитејќи го економскиот стандард на граѓаните и водејќи сметка за економијата на нашата држава“,
рече Дурмиши.
На новинарско прашање околу тоа дека ССМ ја напушти седницата и кој е ставот на другите синдикати, дали се согласни дека треба да се оди со ова законско усогласување, Дурмиши рече ова законско усогласување е донесено порано кога се усогласени сите синдикати, работодавачите и Владата.
„Имаме една законска одлука која е во сила. Денеска на дневен ред не беше да се разговара за формулата или за законските решенија туку само известување за минималната плата по резултатите што ги земавме од ДЗС. Сите други синдикати што беа на седницата се согласија со ова известување“,
одговори тој.
Во обраќањето на седницата, премиерот Христијан Мицкоски најавувајќи го покачувањето на минималната плата, нагласи дека новата сума ќе започне да се исплатува веќе со платата за месец март.
Информацијата за висината на минималната плата за 2026 година, која е усогласена согласно законот, се очекува утре да биде усвоена на владина седница.
„Денеска на дневен ред е информација за висината на минималната плата, која ќе биде во 2026 година согласно закон. Очекувам дека на следната владина седница да го поминеме и како Влада и потоа нормално согласно висината на минималната плата од април за март да почне истата да се исплатува“,
истакна Мицкоски и додаде дека очекува бипартитниот дијалог меѓу работодавците и работниците да продолжи во иднина да се интензивира.
Инаку, денеска Сојузот на синдикати на Македонија (ССМ) ја напушти седницата на Економско-социјалниот совет. Причината, како што вели претседателот на ССМ, Слободан Трендафилов, е намерата „на мала врата да утврдат усогласување на минималната плата за околу 1 600 денари“.
Тој најави дека на средината на овој месец борбата за повисоки плати ќе продолжи повторно со протести.