Според последната одлука на РКЕ, еуросупер БС-95 ќе се продава за 74,5 денари за литар, а еуросупер БС-98 за 76,5 денари за литар. Еуродизел БС (Д-Е V) е 71 денар за литар
Од полноќ за еден денар поскапуваат бензините, а цената на дизел горивата останува иста, одлучи денеска Регулаторната комисија за енергетика, водни услуги и услуги за управување со комунален отпад (РКЕ).
Со ова, се врши зголемување на малопродажните цени на нафтените деривати во просек за 1,13 отсто.
Новата малопродажна цена на еуросупер БС-95 изнесува 74,5 денари за литар, а на еуросупер БС-98 е 76,5 денари за литар. Еуродизел БС (Д-Е V) е 71 денар за литар, екстралесното масло за горење ќе се продава за 70 денари од литар.
За 1,022 денари по килограм се зголемува малопродажната цена на мазутот и ќе се продава 35,542 денари за килограм.
Според РКЕ, референтните цени на нафтените деривати на светскиот пазар во споредба со претходната пресметка бележат зголемување кај бензините во просек за 2,977 отсто, кај дизелот за 0,464 отсто, кај екстралесното масло за 0,37 и кај мазутот за 3,965 отсто.