„Кога ќе ја финализираме, ќе биде објавена оваа потрошуваќка кошничка која ќе се базира на реалните податоци од релевантните институции. Нема да имаме некоја потрошувачка кошничка направена од некој професор или од некои луѓе што не се релевантни, односно не се проверени од институциите. Да не им сееме магла на граѓаните, туку реално да знаат колку пати треба да има едно четиричлено семејство за да помине еден месец“, рече тој
Министерот за економија и труд Бесар Дурмиши денеска информира дека в понеделник ќе се одржи седница на Економско-социјалниот совет (ЕСС), каде како точка на дневниот ред ќе биде ставена и Просечната потрошувачка кошничка, изготвена од страна на Владата, иако за неа се уште немаат предлози, сугестии или забелешки од работодавачите и синдикатите.
Посочи и дека на ЕЕС ќе биде објавена и точната сума за која ќе се зголеми минималната плата.
„Просечната потрошувачка кошничка веќе беше ставена на дневен ред на ЕСС, но одговор во насока на предлози, забелешки, сугестии од другите две страни, односно од работодавачите и синдикатите, се уште немаме. На седницата што ќе се одржи на 2 март, повторно ќе ја ставам на дневен ред за да ја дискутираме. Кога ќе ја финализираме, ќе биде објавена оваа потрошуваќка кошничка која ќе се базира на реалните податоци од релевантните институции. Нема да имаме некоја потрошувачка кошничка направена од некој професор или од некои луѓе што не се релевантни, односно не се проверени од институциите. Да не им сееме магла на граѓаните, туку реално да знаат колку пати треба да има едно четиричлено семејство за да помине еден месец“,
вели тој.
Според него, Владата досега многу пати зборувала за синдикалната кошничка и ги кажала своите забелешки.
„На пример, тие ги објавуваат податоците 10 дена пред да заврши месецот, ги земаат в предвид највисоките цени на прехрамбените производи, ги пресметуваат и трошоците за кирија. Според пописот во 2021 година, 90 отсто од нашето население живее во сопствен дом“,
кажа Дурмиши.
За барањето на синдикатите за зголемување на минималната плата рече дека Владата ќе го поддржи секое решение што ќе го договорат работодавачите и синдикатите.
Заменик-министерот за економија и труд Марјан Ристески на почетокот на месецот рече дека просечната потрошувачка кошничка ќе биде најмалку 10 отсто пониска во однос на синдикалната, а од неа се исклучени цигарите, тутунот, алкохолот и станарината.