Според нив, неспроведувањето на законот и негирањето на ова право испраќа дискриминаторски пораки и ризикува продлабочување на тензиите во мултиетничко општество
Демократската унија за интеграција (ДУИ) денеска поднесе кривична пријава против министерот за правда, обвинувајќи го за прекршувања на Уставот и законите. Од ДУИ велат дека пријавата се однесува за попречување на спроведувањето на Законот за употреба на јазиците.
На денешната прес-конференција, одржана пред Јавното обвинителство, од ДУИ истакнаа дека причина за кривичната пријава е одбивањето на Министерството да организира правосуден испит на албански јазик. Според партијата, со ова директно се кршат член 7 од Уставот и членовите 1, 2, 3 и 9 од Законот за употреба на јазиците кои го признаваат албанскиот јазик како службен јазик покрај македонскиот и ги обврзуваат државните институции да обезбедат употреба на службениот јазик на странките во службените постапки и документи.
Од ДУИ посочуваат дека не се извршуваат службените должности на штета на уставните и законските права на граѓаните Албанци што е спротивно на членот 9 од Уставот (еднаквост на граѓаните пред законот) и член 353 од Кривичниот законик (злоупотреба на службена должност и овластување).
„Овие дејствија претставуваат повреда на рамноправноста на граѓаните согласно член 137 од Кривичниот законик и се спротивни на одредбите од Законот за спречување и заштита од дискриминација, кој забранува секаков облик на дискриминација врз основа на јазик и етничка припадност“,
рекоа од ДУИ на прес-конференцијата.
Според нив, неспроведувањето на законот и негирањето на ова право испраќа дискриминаторски пораки и ризикува продлабочување на тензиите во мултиетничко општество.
Од ДУИ потенцираат дека државните институции се законски обврзани да обезбедат службените процеси и документи да се спроведуваат и на јазикот што го зборуваат најмалку 20 отсто од граѓаните.
Од партијата велат дека Министерството за правда со тоа што не го понудило испитот по правосудство на албански јазик и со тоа што одбиле да го спроведат ова законско право, го има прекршено уставниот принцип на рамноправност и постапиле спротивно на правниот поредок на државата.
Со поднесената пријава, ДУИ бара од Основното јавно обвинителство веднаш да отвори истрага, да го процесуира случајот пред надлежен суд и да гарантира спроведување на законот без каква било форма на дискриминација.
Кривичната пријава од ДУИ следува откако министерот за правда Игор Филков на почетокот од месецов рече дека во Министерството за правда била разгледана петиција поднесена од студентите во врска со полагањето на правосудниот испит на албански јазик, при што внимателно биле анализирани сите релевантни уставни и законски одредби.
Тој додаде дека Законот за употреба на јазиците овозможува употреба на албанскиот јазик како службен јазик во постапките пред институциите, но неговата примена не може да се разгледува изолирано од другите системски закони што го уредуваат функционирањето на правосудството.
Неговата тогашна објава на Фејсбук следуваше како реакција на изјавите на вицепремиерот Беким Сали за полагањето на правосудниот испит на албански јазик.
За преписките меѓу Филков и Сали и за полагањето на правосудниот испит на албански јазик, премиерот Христијан Мицкоски повикувајќи се на амандманот V oд Уставот, рече дека правосудниот испит може да се полага и на албански јазик, но претходно тоа треба да биде утврдено со закон. Актуелниот закон, како што кажа Мицкоски, не го дозволува тоа.
Премиерот вели дека тој е подготвен тоа да се регулира со нов закон, со кој правосудниот испит ќе може да се полага не само на албански јазик, туку и на јазиците на другите делови од народи што се запишани во Преамбулата на Уставот.