„Од објавите на српските медиуми се отвораат сомнежи за можна поврзаност и на други функционери на ВМРО. Прашуваме: каква е улогата на директорот на СОЗР и новоназначен организациски секретар на ВМРО. Ова не е прашање на политика, туку на владеење на правото“, вели портпаролката на опозициската партија
Опозицискиот Социјалдемократски сојуз (СДСМ) денеска ја обвини власта дека и по 11 дена сè уште нема одговор за тоа како пет тона дрога ја поминале македонската граница и завршиле во Србија. Молкот, како што велат, не е случајност, туку индикатор дека овој скандал води кон врвот на власта и дека некој се обидува да го забошоти овој огромен наркоскандал. Ова денеска го соопшти портпаролката на СДСМ, Богданка Кузеска, посочувајќи дека наместо одговори, власта прави медиумска магла за да побегне од клучното прашање.
„Македонскиот Мадуро, Мицкоски, лицитира во медиумите, 25 тони, 40 тони, а сега најавува 100 тони. Дали сите фирми се легални? Тоа ли го порачува Мицкоски? Ако е така, зошто не била навреме направена контрола, зошто власта дозволила нелегално да се произведува и складира? Не се кажува дали државата ги субвенционира? Што ќе се случи ако компаниите побараат отштета?“,
праша Кузеска.
Посочи и дека српските медиуми постојано објавуваат нови информации за овој случај, според кои уапсениот функционер на партијата СНС, сестринска партија на ВМРО-ДПМНЕ, поврзан со заплената во Крушевац, бил близок со српскиот министер за одбрана Братислав Гашиќ.
„Доколку ова се потврди, се отвораат сомнежи за можна поврзаност и на други функционери на ВМРО. Прашуваме: каква е улогата на директорот на СОЗР и новоназначен организациски секретар на ВМРО. Ова не е прашање на политика, туку на владеење на правото“,
рече таа.
Според неа, СДСМ нема да дозволи овој случај да се заташка и оти ќе продолжат да бараат одговори, како и целосна истрага и одговорност за сите, без разлика на функцијата или партиската припадност.
Српската полиција на 29 јануари соопшти дека во соработка со Јавното обвинителство за организиран криминал запленила пет тони марихуана во реонот на селото Коњух кај Крушевац, во централна Србија.