Првиот вицепремиер на Украина, Денис Шмихал рече дека нападот во југоисточниот регион Дњепропетровск бил циничен и насочен напад врз работници од енергетскиот сектор
Во руски напад со дронови врз автобус што превезувал рудари загинаа најмалку 12 лица, соопштија украинските власти неколку часа откако претседателот Володимир Зеленски објави нови мировни преговори, во услови на неизвесност околу најавата на Русија дека ќе ги запре нападите врз енергетската инфраструктура.
Првиот вицепремиер Денис Шмихал рече дека нападот во југоисточниот регион Дњепропетровск бил циничен и насочен напад врз работници од енергетскиот сектор.
Киев е под притисок од Соединетите Американски Држави (САД) да прифати мировен договор во речиси четиригодишната војна, додека се бори со рускиот налет на воздушни напади што го уништија енергетскиот систем на земјата за време на една од најстудените зими во последните години.
Првата рунда трилатерални разговори меѓу Украина и Русија, посредувани од САД, се одржа кон крајот на јануари, но не се постигна напредок по клучното прашање за територијата.
Москва бара Киев да се откаже од дел од територијата на истокот на земјата, што Украина не е подготвена да го стори.
Зеленски рече дека нова рунда разговори ќе се одржи на 4 и 5 февруари и дека Украина, која се бори да го запре рускиот напредок на бојното поле, е подготвена за суштински преговори.
Кремљ пред два дена објави дека се согласил на прекин на нападите врз енергетската инфраструктура до недела, на барање на американскиот претседател Доналд Трамп, а Киев се согласи да го стори истото.
Украина, која денеска се соочи со нов студен бран со температури околу минус 15 степени, побара прекинот да трае до следниот петок.