Одлуката партиите да дејствуваат како единствен политички субјект во рамки на ДУИ била донесена на денешната средба меѓу Ахмети и Хоџа, а ќе биде официјализирана по формалното одобрување од Генералниот совет на Демократската унија за интеграција
Европската демократска партија на Аријанит Хоџа отсега ќе дејствува во рамки на Демократската унија за интеграција (ДУИ) на Али Ахмети. Одлуката партиите да дејствуваат како единствен политички субјект во рамки на ДУИ била донесена на денешната средба меѓу Ахмети и Хоџа, а ќе биде официјализирана по формалното одобрување од Генералниот совет на Демократската унија за интеграција.
„Партиите се согласија во иднина да функционираат како единствен политички субјект во рамки на ДУИ како најконсолидирана и најорганизирана албанска партија во земјата преку обединување на организациските, програмските и човечките капацитети, во служба на општиот интерес на Албанците во Северна Македонија“,
се наведува во соопштението на ДУИ објавено на социјалните мрежи.
Оттаму посочуваат дека средбата меѓу Ахмети и Хоџа следува по јавниот повик на ДУИ за обединување на партиите кои ја делат истата визија за достоинствено претставување и политичка иднина на Албанците во земјава.
„Средбата се одржа во конструктивен дух и меѓусебна волја за политичка соработка, со посебен акцент на потребата од обединување на албанските политички фактори околу заедничка платформа која гарантира стабилност, силна институционална застапеност и унапредување на евроинтегративните процеси на земјата“,
велат од ДУИ.
Аријанит Хоџа до летото 2023 година беше заменик-претседател на Движењето Беса, но најави дека ќе се повлече од партијата и ќе формира нова откако Билал Касами, Африм Гаши и Изет Меџити, кој тогаш се отцепи од ДУИ, соопштија дека создаваат заеднички опозициски фронт. Во август истата година ја формира Европска демократска партија.
Партијата на Хоџа пред парламентарните избори во 2024 година стана дел од „Европскиот фронт“ предводен од ДУИ, а во коалицијата НАИ на Ахмети настапија и на ланските локални избори.