Таа вели дека зад грбот на народот течат криминални тендери, а за тоа време пред очите на граѓаните кујните на ВМРО-ДПМНЕ им сервираат измислени афери, црни кампањи и јавен линч врз опозицијата
Владата на Мицкоски и ВМРО-ДПМНЕ нема решенија ниту одговори на проблемите со кои секојдневно се соочуваат граѓаните. Секојдневните скандали и катастрофалната економска состојба ги покрива со постојан дефокус и пренасочување на вниманието на граѓаните, вели портпаролката на СДСМ, Богданка Кузеска.
Таа вели дека зад грбот на народот течат криминални тендери, а за тоа време пред очите на граѓаните кујните на ВМРО-ДПМНЕ им сервираат измислени афери, црни кампањи и јавен линч врз опозицијата.
Кузеска на денешната прес-конференција даде хронологија на политиката на ВМРО-ДПМНЕ за дефокус само во последните два месеци.
Кузеска посочи на 161 тендер за една фирма и скандал од девет милиони евра поврзан со фирма блиска до партијата ЗНАМ, како и на информацијата дека поради корупциски скандал со програмата ИПАРД 3, ЕУ ги блокирала средствата.
Портпаролката потсети дека во првата половина на декември месец британските медиуми објавија информации дека постои договор за носење мигранти за пари во Македонија.
„После овие вести, штанцањето теми за дефокус отидоа до плафон, дефокусот стана единствена политика на ВМРО-ДПМНЕ“,
рече Кузеска.
Според Кузеска, нема одговори за ниту едно прашање од интерес на граѓаните туку има само дефокус.
„Сега веќе сите во Македонија знаат: секогаш кога ќе излезе некоја измислена, фабрикувана афера, тоа е дефокус. Секогаш кога ќе излезе текст од кујните на ВМРО-ДПМНЕ се случува уште една пљачка зад грбот на народот“,
рече Кузеска.
Таа додаде дека планот е едноставен, а тоа е изолација, избори, па мигранти за пари.