„Бараме МВР и Јавното обвинителство да утврдат кој, како и од каде ги транспортира и истовара овие животни, затоа што ова не е изолиран чин, туку логистички организирана активност. Масовното напуштање и дислоцирање на кучиња претставува суровост, но и сериозна општа опасност“, велат од Здружението
Здружението за заштита на животни „Анима мунди“ денеска упати апел до надлежните институции, барајќи темелна и независна истрага за, како што велат, сериозни индиции за организирано внесување и дислоцирање кучиња во главниот град. Според здружението, оваа појава веќе директно ги загрозува јавната безбедност, владеењето на правото и благосостојбата на животните.
Од Здружението како пример наведуваат дека во Општина Карпош изминативе денови се појавила нова глутница кучиња кои се целосно непознати за локалното население. Станува збор, како што велат, за нестерилизирани и необележани животни, за кои од здружението тврдат дека не може да бидат природен прираст, туку резултат на насилна дислокација.
„Јавно и одговорно тврдиме дека станува збор за организирано внесување, бидејќи ЈП ‘Лајка’ нема испуштено ваква бројка нестерилизирани животни на ниту една локација во Скопје“,
стои во соопштението на „Анима мунди“.
Од Здружението велат дека на терен во Скопје се пронајдени кучиња со ушни маркици од Република Албанија. Ова, според нив, отвора сомнежи за нелегален прекуграничен транспорт и напуштање животни.
Оттаму бараат итна реакција од институциите. Велат дека треба да се направи целосна проверка на сите безбедносни камери, јавни и приватни, на локациите каде што се појавиле кучињата, како и на сите влезно-излезни правци кон Скопје.
„Бараме МВР и Јавното обвинителство да утврдат кој, како и од каде ги транспортира и истовара овие животни, затоа што ова не е изолиран чин, туку логистички организирана активност. Масовното напуштање и дислоцирање на кучиња претставува суровост, но и сериозна општа опасност“,
додаваат од „Анима мунди“.
Исто така, додаваат од Здружението, потребна е измена на законската рамка, за што велат дека веќе имаат поднесено конкретни предлози за измени на Законот за заштита и благосостојба на животните, со кои бараат најстрого регулирање на сопствеништвото на кучиња и по примерот на Хрватска, напуштањето миленик и предизвикувањето општа опасност да се третираат како кривични дела.
Од „Анима мунди“ велат дека е потребна координација преку ЗЕЛС и упатуваат повик до сите градоначалници за хуман пристап, масовна стерилизација и строги санкции за секое дислоцирање кучиња меѓу општините. Тие се децидни дека ниту едно јавно претпријатие не може да го реши проблемот доколку постои институционална инертност и толерирање криминални дејствија.
„Ова е системска злоупотреба и мора да биде санкционирана. Бараме истрага, одговорност и итни мерки веднаш и насекаде за да се фатат сторителите и најстрого да одговараат, согласно закон“,
додаваат од Здружението.
Во врска со овој проблем денеска се огласија и од Општина Карпош, од каде што велат дека ја следат состојбата со зголемениот број улични кучиња. Оттаму додаваат оти веднаш реагирале до Град Скопје и до ЈП „Лајка“ со барање за заедничка соработка и решавање на овој проблем. Од Карпош велат дека екипите од „Лајка“ веќе се на терен на повеќе локации во општината, при што се врши заловување и хуман третман на кучињата согласно процедурите и стандардите за благосостојба на животните.
Скопјани на социјалните мрежи поставуваат фотографии од улични кучиња кои може да се види дека се во поголем број и за кои се тврди дека се донесени и истоварени во делови од градот.
Советничката во Општина Карпош, Татјана Стојановска, на својот фејсбук-профил објави фотографија на која се гледаат повеќе од 10 улични кучиња како се легнати во тревник спроти „Сити мол“.