Притоа на сила остануваат сите активни мерки: ПЦР тест, самоизолација или државен карантин
Од утре, 17 јуни се отворат сите гранични премини во земјата, одлучи Владата на денешната седница. Притоа се истакнува дека на сила остануваат активните мерки кои предвидуваат:
-за влез во земјава е задолжително да се приложи валиден негативен ПЦР тест, не постар од 72 часа,
– потпишување „Изјава за задолжителна самоизолација во траење од 14 дена“, врз основа на која Државниот санитарен и здравствен инспекторат изготвува Решение за здравствен надзор и домашна самоизолација, која ја контролира МВР,
– државен карантин во траење од 14 дена, за сите граѓани или странци со регулиран престој во земјава, коишто при влез во земјава нема да приложат валиден ПЦР тест или ќе приложат невалиден ПЦР тест.
Од Влдата исто така посочуваат дека останува и можноста граѓаните кои се во државен карантин и што сакаат да им се направи ПЦР тест на нивно барање, тоа да им се овозможи од страна на овластена институција во најкраток рок. Оние граѓани на кои направениот ПЦР тест е негативен, потпишуваат „Изјава за задолжителна самоизолација во траење од 14 дена“ каде се пресметани и деновите поминати во државен карантин, и го напуштат државниот карантин и заминуваат во задолжителна самоизолација на адресата определена во дадената изјава.
Доколку граѓаните не сакат да им се направи ПЦР тест, остануваат во карантин 14 дена, а по тој рок од страна на овластени претставници од ДСЗИ им се изготвува Решение за здравствен надзор и домашна самоизолација.