Според министерката за внатрешни работи Албана Кочиу, низ целата земја се распоредени околу 5 500 службеници на државната полиција, со околу 700 возила на располагање. Во меѓувреме, според Кочиу, противпожарната служба распоредила над 720 службеници, 55 противпожарни возила и 22 пумпи во најпроблематичните области
Врнежите од дожд се намалени низ цела Албанија, освен во Драч. Досега низ целата земја се пребројани 1 587 поплавени домови и други објекти. Евакуирани се 339 лица и 51 семејство. Регистрирана е и една жртва од поплавите, вработен во комуналната служба на општина Драч, информира на денешниот состанок на Меѓуминистерскиот комитет за цивилни вонредни ситуации, премиерот на Албанија, Еди Рама.
На состанокот беа презентирани информации за ситуацијата создадена од невремето во последните денови, како резултат на екстремно високото ниво на врнежи од дожд.
Рама нагласи и дека под вода се 13 211 хектари земјоделско земјиште.
„Имаме присуство на вода и во некои здравствени центри или образовни установи. Количината на врнежи од дожд е голема, до 300 милиметри на квадратен метар, или повеќе од просечната количина на врнежи од дожд што паѓаат во текот на целиот месец. Значи, просечните 30-дневни врнежи од дожд во месецот наврнале во период од три или четири дена. Овој феномен доаѓа како резултат на климатските промени и станува сè помалку неочекуван низ целиот свет“,
нагласи Рама ветувајќи дека секому ќе му биде надоместена штетата.
Вицепремиерката и министерка за инфраструктура и енергетика Белинда Балуку оцени дека ситуацијата денеска изгледа подобра на национално ниво.
„Ситуацијата со напојувањето со електрична енергија е речиси стабилизирана. Повеќе од 1 600 вработени беа на терен. Од 2 јануари, тие се ангажирани во најпогодените области Тирана, Драч, Валона, Ѓирокастро и Елбасан. Северот е исто така под надзор, но благодарение на инвестициите што ги направивме таму, областите се заштитени и помалку проблематични“,
изјави Балуку.
Според министерката за внатрешни работи Албана Кочиу, низ целата земја се распоредени околу 5 500 службеници на државната полиција, со околу 700 возила на располагање. Во меѓувреме, според Кочиу, противпожарната служба распоредила над 720 службеници, 55 противпожарни возила и 22 пумпи во најпроблематичните области.