Според лидерот на опозициската партија, нереалните барања за одблокирање на пристапниот процес се всушност само изговор на власта за земјата да се држи изолирана од ЕУ
Владата и претседателката на државата Гордана Сиљановска-Давкова имаат некакви барања кон Европската Унија во однос на евроинтеграциите, но очигледно е дека тие не можат да се исполнат бидејќи се нереални, вели лидерот на Социјалдемократскиот сојуз на Македонија (СДСМ), Венко Филипче. Тоа, како што додава тој, на актуелниот државен врв му е кажано од сите истанции на ЕУ, од сите европски функционери и лидери на големи европски држави.
Според лидерот на опозициската партија, нереалните барања за одблокирање на пристапниот процес се всушност само изговор на власта за земјата да се држи изолирана од ЕУ.
„Не постои друго објаснување кога на сите им е веќе јасно дека нивните барања се практично нереални и се само причина да не се направи чекорот напред кон Европската Унија“,
рече Филипче на денешниот отворен брифинг со новинарите.
Говорејќи во тој контекст, лидерот на СДСМ направи споредба со седумгодишниот период кога Владата ја предводеше неговата партија и кога, како што кажа, биле направени клучни чекори во насока на евроатлантските интеграции.
Рече дека тогаш бил постигнат Преспанскиот договор со кој се решил повеќедеценискиот спор со Грција за името, по што земјава стана членка на НАТО, што во актуелниот геополитички контекст, со војна во Украина и други закани, се покажал како многу важна работа.
За овој потег, рече тој, тогашната влада била жестоко критикувана од тогаш опозициската ВМРО-ДПМНЕ, која деноноќно работела да ја прикаже СДСМ како предавничка партија, за што, како што кажа Филипче, треба да им се оддаде признание.
„Можете да замислете што ќе се случуваше тука ако не се решеше тој повеќедецениски проблем. Референцата ФИРОМ се замени со Северна Македонија, се реши проблемот, се направи чекор напред кон Европската Унија, се заврши скринингот, процесот започна… Кога не напаѓаа на времето кога се носеа тие големи одлуки – Преспанскиот договор, а потоа и францускиот предлог бевме сведоци на страшни реакции, афери и напади на наши членови, валкање на нивните имиња, компромитација, факт е дека не се одбранивме од таа нивна силна пропаганда“,
рече Филипче.
Клучното прашање е зошто е запрен процесот за интеграција во ЕУ, а одговорот според Филипче е едноставен – поради криминал и корупција и ништо друго.
„Со самото тоа што нема реформи во делот на правосудството, со самото тоа што не се отвораат вратите за европското обвинителство овде цвета криминалот и корупцијата на оваа крајно корумпирана власт. Си именуваат обвинители, гледаме како си поставуваат луѓе блиски до власта со цел да ги заштитат своите членови и да влезат во политичка пресметка со сите други политички неистомисленици“,
кажа лидерот на СДСМ.
Во тој контакт, Филипче се осврна и на спорот со Бугарија, кој, како што кажа, „пиаровските кујни на ВМРО-ДПМНЕ и ЗНАМ повторно го наметнуваат во политичкиот дискурс.
Според Филипче, прашањето со Бугарите е завршена работа и нивното внесување во Уставот е само еден механизам за да стигнеме до зацртаната цел – Европската Унија, додека позициите на актуелната власт повторно се со цел за запирање на реформските процеси за да може да цвета криминалот и корупцијата.
„Вметнувањето на Бугарите во Уставот е нешто што ќе нè донесе таму каде што ние стратешки со децении наназад се стремиме да стигнеме. И тоа е повторно една форма на извртување на фактите, спинување, а се со цел нешто да се претстави како некакво предавство, а во суштина работата е да нема реформи, да нема вистинска трансформација на правосудството, да нема европски обвинители и да продолжи да цвета криминалот и корупцијата“,
рече тој.
Во врска со овие прашања, Филипче порача дека овој пат пропагандата на ВМРО-ДПМНЕ нема да помине оти, како што додаде, СДСМ сега точно знае со што се соочува и знае како да се бори и да се справи со нападите.