„Секогаш ќе има деца што ќе се соочуваат со здравствени предизвици и ниту едно не смее да биде изолирано од настава. Со ова решение исправивме една голема неправда од минатото и спречуваме еден облик на дискриминација да се провлекува во иднина“, кажа министерката
Триесет и пет деца, кои се на подолготрајно болничко лекување, беа вклучени во наставата во првото полугодие од оваа учебна година, соопшти денеска министерката за образование Весна Јаневска.
„Секогаш ќе има деца што ќе се соочуваат со здравствени предизвици и ниту едно не смее да биде изолирано од настава. Со ова решение исправивме една голема неправда од минатото и спречуваме еден облик на дискриминација да се провлекува во иднина. Затоа е важно децата и нивните родители да се информирани за можноста, а наставниците се први што треба да се запознаат дека физичкото отсуство од училница не значи и застој во образованието“,
рече таа.
Со цел да се реализира овој тип настава, Министерството за образование и наука (МОН) спроведе обуки за над 160 наставници во 83 училишта.
„Подготвивме и прирачник за наставници со јасни инструкции како да се вклучат децата во настава, преку која форма, како да водат педагошка евиденција, да го проверуваат знаењето на учениците. Според сите информации што ги добивам од училиштата, наставниците, родителите и здружението САНО, ова решение одлично функционира“,
вели Јаневска.
Од септември годинава стартуваше новото системско решение според кое, учениците што отсуствуваат од настава подолго од три недели, затоа што се на болничко лекување, можат да го продолжат образованието преку онлајн вклучување во наставата во реално време во својот клас, како и да ги користат доставените материјали и задачи од наставникот.
Наставникот може и да организира индивидуална настава во зависност од состојбата на ученикот, по приспособена наставна програма на таквата состојба и за тоа да се користат постојните дигитални алатки.
Од Министерството за образование велат дека станува збор за системска мерка која е уредена во закон и со подзаконски акти.