Првичните извештаи велат дека танкерот најверојатно не е на списокот бродови санкционирани од САД, што доколку биде потврдено, би значело ескалација на американската блокада
Американските сили денеска заплениле уште еден, втор по ред, трговски брод што превезувал нафта во меѓународни води покрај брегот на Венецуела, потврдија надлежните власти во САД, пренесуваат светските медумите.
Последната акција доаѓа откако на 10 декември американските сили запленија друг танкер за нафта покрај брегот на Венецуела. И двата брода се движеа кон Азија.
Од британската компанија за управување со поморски ризици „Вангард“ за Ројтерс изјавиле дека најверојатно станува збор за брод кој пловел под панамско знаме и бил пресретнат источно од Барбадос во Карипското Море, објави „Гардијан“.
Првичните извештаи велат дека танкерот најверојатно не е на списокот бродови санкционирани од САД, што доколку биде потврдено, би значело ескалација на американската блокада.
Секретарката за внатрешна безбедност на САД, Кристи Ноем, во објава на социјалната платформа Икс соопшти дека крајбрежната стража на САД и припадници на Министерството за одбрана го запреле танкерот денеска рано наутро.
„Соединетите Американски Држави ќе продолжат да го гонат нелегалното движење на санкционирана нафта што се користи за финансирање на наркотероризмот во регионот. Ќе ве пронајдеме и ќе ве запреме“,
вели Ноем.
Од администрацијата на САД посочиле дека секој брод што носи венецуелска нафта може да биде предмет на блокадата и дека Соединетите Држави работат на проширување на листата со санкционирани бродови.
Ваквиот развој на настаните доаѓа откако американскиот претседател Доналд Трамп и неговите советници рекоа дека не ја исклучуваат можноста за отворен конфликт со Венецуела. Најавите дојдоа по повикот на венецуелскиот претседател, Николас Мадуро, до морнарица на земјата да ги придружува танкерите за нафта, пркосејќи ѝ на тој начин на најголемата американска флота распоредена во регионот во последниве децении.
Откако беше запленет првиот танкер за нафта, венецуелската влада преку соопштение изјави дека САД извршиле „бесрамна кражба“ и ја опишаа акцијата како „чин на меѓународно пиратство“.
Во интервју емитувано во петокот, Трамп за Ен-би-си Њуз изјави дека можноста за војна со режимот во Венецуела останува на маса.
„Не го исклучувам тоа, не“,
рече тој во телефонското интервју за телевизиската мрежа.
САД дополнително го засилија притисокот врз Венецуела оваа недела, обвинувајќи ја земјата дека зела американска нафта, како и дека САД изгубиле инвестиции во земјата.
„Се сеќавате дека ни ги зедоа сите енергетски права. Не толку одамна ни ја зедоа целата нафта. И ја сакаме назад. Ја зедоа, нелегално ја зедоа“,
рече Трамп.
Во вторникот, американскиот претседател нареди „тотална и целосна“ блокада на сите санкционирани танкери за нафта што влегуваат и излегуваат од Венецуела.
Два дена подоцна, американската војска изврши уште еден смртоносен напад врз брод за кој властите во Вашингтон тврдат дека бил вклучен во трговија со дрога во источниот Пацифик. Во нападот загинаа четири лица со што бројот на жртви во американската кампања против бродови кои наводно шверцуваат наркотици во регионот на Карипското Море и во источниот Пацифик се искачи на 99 лица.
Од друга страна, претседателот на Венецуела, Николас Мадуро, ги обвинува САД дека целта на нападите не е спречување на шверцот на наркотици, туку рушење на власта во Венецуела.
Мексиканската претседателка, Клаудија Шајнбаум, во меѓувреме се вклучи во спорот, прозивајќи ги Обединетите нации (ОН) дека не преземаат ништо во врска со случувањата поврзани со Венецуела. Таа побара од светската организација активен ангажман за да се „спречи какво било крвопролевање“.