„Каматите се пониски од просечната инфлација во државата. Не влегуваат во државниот долг, не влегуваат во јавниот долг, ние велиме – тоа се заеми под црта. Со што, пак, од друга страна, еврообврзницата која што сега ќе ја дадеме, ни овозможува пониска камата за државата. И кога сето тоа ќе се анализира, се прави кеш флоу и во тоа кеш флоу е подобра оваа политика што ја водиме сега, отколку да трансферираме пари“, вели премиерот на темата – субвенционирање на цената на струјата за домаќинствата
Премиерот Христијан Мицкоски вели дека има логика во тоа што Електрани на Северна Македонија (ЕСМ) не добиваат директно пари од државниот буџет, туку со државна гаранција се задолжува кај комерцијалните банки. Мицкоски ова го кажа во интервју за „360 степени“ на МРТ 1.
Мицкоски: ЕСМ добива преку државна гаранција заем од комерцијалните банки веќе два до три пати. И тоа свесно го правиме. Затоа што во тој случај имаме грејс период. А ние проценивме дека во рамките на тој грејс период, со консолидирање на работењето во ЕСМ и формирањето на рудник, домашен ископ, а не увоз, намалени увози, намалени количини, ќе ја консолидираме работата на ЕСМ за да дојдеме најпрво до позитивна нула – велта ни е крајот на 2027 година. А потоа веќе од 2028-2029 г. да може ЕСМ да генерира добивки со коишто тие кредити би се враќале.
„360 степени“: Но, тоа што нема трансфери од буџетот кон ЕСМ, не значи дека нема трошење на државни пари за да се покрива разликата меѓу 65 евра по коишто ЕСМ ја продава струјата на универзалниот снабдувач и околу 100 евра колку што чини просечната производна цена на струјата на Електрани.
Мицкоски: Ако средствата на ЕСМ ги сметаме како државни пари – да, има трошење на државни пари.
„360 степени“: Тоа е акционерско друштво во државна сопственост.
Мицкоски: Така е. Но, трансфери, како што тоа го правеше минатата Влада, еве ви сто милиони евра, па вие потоа ќе ги потрошите на сомнителни јавни набавки, такви работи нема.
„360 степени“: Ама на тие пари од државниот буџет барем нема камати. На парите од комерцијалните банки има камати.
Мицкоски: Каматите се пониски од просечната инфлација во државата. Не влегуваат во државниот долг, не влегуваат во јавниот долг, ние велиме – тоа се заеми под црта. Со што, пак, од друга страна, еврообврзницата која што сега ќе ја дадеме, ни овозможува пониска камата за државата. И кога сето тоа ќе се анализира, се прави кеш флоу и во тоа кеш флоу е подобра оваа политика што ја водиме сега, отколку да трансферираме пари.
Во однос на големиот тендер од 25 милиони евра за ископ на јаглен и јаловина во РЕК „Битола“ што го доби малата „Топлина“ од охридско Подмоље, Мицкоски вели дека станува збор за договор со пониска цена од онаа што се плаќала претходно.
„Од тие информации коишто јас ги имам е дека на тендерот е некаде околу 15 проценти пониска цената од таа која што била во минатото достигната. Што за мене е важно, бидејќи ќе се заштеди. Бидејќи често пати разговарам со луѓето од ЕСМ, поранешно ЕЛЕМ и од РЕК ’Битола’. Како е ископот на јаглен, какви се количините. Имајќи предвид дека сме зима и дека треба да се задоволи енергетскиот баланс. Од одговорите коишто ги добивам е дека тие апсолутно си ја вршат работата како што треба, бидејќи количините на јаглен се доволни за да се задоволи потребата на граѓаните. И тоа е тоа што е за мене важно. Сето останато јас не би го коментирал, затоа што на вас новинарите е да истражите. На обвинителството е да констатира дали има нешто незаконито или законито направено, криминално. На јавноста е да цени и да суди. И на крајот од денот ние политичарите излегуваме на избори и таму ја добиваме конечната оценка за сите овие дилеми за коишто ние сега зборуваме“,
вели премиерот.