„Поцев бил сведок во случајот ‘Тагрет-Тврдина’ за уништувањето на опремата за масовно прислушување, како вработен во УБК во периодот на Сашо Мијалков. А токму последниот договор со Владата и оваа фирма е рамковна спогодба за софтверски лиценци за виртуелна платформа“, изјави портпаролката на СДСМ на денешната прес-конференција
Опозицискиот Социјалдемократски сојуз на Македонија (СДСМ) денеска продолжи со изнесување нови обвинувања во врска со, како што велат, криминалните тендерски шеми на власта на Христијан Мицкоски.
За потсетување, партијата вчера почна со објавување сознанија за фирма што била формирана пред нешто повеќе од една година и за само неколку месеци годинава добила државни тендери во вредност од девет милиони евра.
Генералниот секретар на СДСМ, Александар Саша Димитријевиќ, вчера на прес-конференција наведе дека станува збор за фирма која има само двајца вработени и праша дали еден од нив кој се јавува како нејзин основач е роднина на поранешниот портпарол на ВМРО-ДПМНЕ, Димче Арсовски.
Тој кажа, дека меѓу тендерите што ги добила оваа фирма е и рамковна спогодба за софтверски лиценци за виртуелна платформа во вредност од 8 милиони евра.
Портпаролката на СДСМ, Богданка Кузеска, на прес-конференција изнесе тврдења дека другиот вработен во фирмата е поранешен вработен во тогашната Управа за безбедност и контраразузнавање (УБК), во периодот додека со неа раководеше Сашо Мијалков. Ова лице, како што кажа, Кузеска, било и сведок во случајот „Таргет-Тврдина“ за уништувањето на опремата за прислушување.
„Станува збор за извесен Глигор Поцев. Поцев бил сведок во случајот ‘Тагрет-Тврдина’ за уништувањето на опремата за масовно прислушување, како вработен во УБК во периодот на Сашо Мијалков. А токму последниот договор со Владата и оваа фирма е рамковна спогодба за софтверски лиценци за виртуелна платформа“,
рече Кузеска.
Портпаролката на СДСМ праша како лица кои биле дел од разузнавачки структури, кои директно или индиректно се поврзани со процеси за уништување на опремата за прислушување сега пак се во игра за милионски тендери за софтвери.
„И како тоа баш сега Владата на Мицкоски избрала човек токму од тоа време, од тие структури, сведок за уништувањето на опремата?“,
праша таа.
Надоврзувајќи се во таа насока, портпаролката рече дека овој случај јасно покажува дека владејачката партија ВМРО-ДПМНЕ се користи со истите методи како и претходното раководство за испумпување пари на граѓаните преку милионски тендери.
„Скандалот со тендери вредни 9 милиони евра, дадени на фирма од две лица основана од пред само една година, јасно покажува дека кај Христијан Мицкоски владее истата криминална школа на Никола Груевски и Сашо Мијалков. Методите се исти, милионски тендери платени од пари на граѓаните на фирми со сомнителна или релативно непостоечка историја“,
рече Кузеска.
Таа обвини дека целта на ваквите шеми е иста – богатење на партијата и поединци од врхушката на власт. Дури, како што кажа таа, и луѓето се од „истиот груевистички период очигледно“.
„Ништо од ова не е случајно, ова е криминален систем за крадење пари од граѓаните и контрола за кој мора да има истрага и одговорност. Крадењето мора да запре. Институциите мора да дејствуваат и да преземат мерки согласно законот. Предупредуваме да знаат сите дека овие дела не застаруваат. Одговорност мора да има и ќе има, кога-тогаш! Работата сè уште не е завршена“,
порача портпаролката на СДСМ.
Од СДСМ објавија исечок од профилот на вработениот во фирмата „Дигитал оне“, за кој велат дека поранешен вработен во УБК, податоци за фирмата од Централниот регистар, како и договорите што ги добила со Владата и други државни институции.
Инаку, по вчерашната прес-конференција на СДСМ, преку објава на Фејсбук реагираше поранешниот портпарол на ВМРО-ДПМНЕ, Димче Аросвски. Тој вели дека не е во роднинска врска и не ги познава сопствениците на фирмата „Дигитал оне“, како и дека ниту има, ниту имал никаква врска со државни тендери.
Арсовски обвини за манипулации и побара јавно извинување од СДСМ.
„Иако во прашална форма, моето име и презиме беше споменато на пресот на СДСМ, тенденциозно со намера да ме вовлечат во нивни креатури и да ги манипулираат граѓаните и јавноста, па затоа јавно барам извинување од СДСМ, ако им остана малку достоинство“,
напиша Арсовски.
Од СДСМ, пак, одговорија дека воопшто немаат намера да се извинат.
„Сите вие во ВМРО-ДПМНЕ сте роднини по криминал, а ние не им се извинуваме на криминалци“,
рекоа од Бихаќка.
Од опозицијата посочија дека не барале роднинско стебло ниту, пак, извод од Димче Арсовски, туку да одговори на прашањата дали е роднински поврзан со основачот на фирмата „Дигитал оне“, формирана лани на крајот на август, со само двајца работници, а која за една година има добиено тендери од скоро девет милиони евра.