Според полицијата, во пробниот период, сторителите ќе добиваат известување за сторениот сообраќаен прекршок. Тој е предвиден да функционира до Нова година, а од јануари идната година, системот ќе почне целосно да се применува
Од утре, 1 декември почнува пробниот период за системот „Безбеден град“ за автоматизирано регистрирање сообраќајни прекршоци, информираат од Министерството за внатрешни работи (МВР).
„Во пробниот период, сторителите ќе добиваат известување за сторениот сообраќаен прекршок“,
се вели во соопштението од полицијата.
Инаку, пробниот период е предвиден до Нова година, кога возачите ќе добиваат само предупредување за сторените прекршоци, без изрекување казни, а од јануари идната година, системот ќе почне целосно да се применува.
„Сторителите на прекршоци што ќе бидат документирани преку овој систем ќе бидат санкционирани согласно одредба што ја регулира најголемата дозволена брзина на движење на возилата. Нема да има толеренација без разлика дали ќе се документира прекршок во населено место или надвор од населено место“,
велат од МВР.
Сопствениците на возилата чие прекршување ќе биде документирано, ќе добијат СМС и маил известување со линк, на кој ќе се може да се преземе записник и платен налог. Од моментот на приемот, тече рок од осум дена за плаќање половина од сумата на казната.
По истекот на тој рок, износот мора целосно да се плати во следните осум дена, пред да почне постапката за присилна наплата.
Казните ќе можат да се плаќаат и електронски, а системот веднаш ќе ја известува полицијата дека глобата е платена.
Министерот за внатрешни работи, Панче Тошковски во февруари годинава најави дека системот „Сејф сити“ треба да профункционира од 1 јануари 2026 година.
Кон крајот на август годинава најави дека неговата имплементација ќе почне во Скопје, Тетово и во Куманово.
Според него, целта е до средината на следната година со овој систем што детектира сообраќајни прекршоци да биде покриена целата територија на државата.
„Се надевам дека коридорите 8 и 10 ќе бидат дел од првичната имплементација и ставање во функција на овој систем. Целта е до средината на 2026 година со овој систем што детектира сообраќајни прекршоци да биде покриена целата територија на државата“,
рече тој.
Со овој систем, како што додаде, не е целта да се казнуваат граѓаните и да се полни буџетот на државата, туку да се спаси барем еден човечки живот повеќе од претходно.
Очигледно е, вли министерот, дека конзервативниот начин на борба против сообраќајните прекршоци и сторени кривични дела не дава резултати, па затоа се прави суштинска измена на законските прописи, имплементација на проектот „Сејф сити“ и заострување на казните против оние што безобѕирно управуваат со моторни возила.