Посочи дека не ја разбира логиката и тактиките на САД во однос на НИС и со продолжување на дозволата за работа на компанијата
Речиси е сигурен дека американскиот претседател Доналд Трамп не е запознаен со деталите, но дека многу високи функционери во Стејт департментот се свесни за состојбата на НИС и дека ова е очигледно политика што ја поддржуваат
Српскиот претседател Александар Вучиќ денеска објави дека од вторник нема да работи рафинеријата „Нафтена индустрија на Србија“ (НИС) во Панчево, пренесува регионалниот сервис на Радио слободна Европа (РСЕ). Сепак, додаде дека граѓаните треба да останат смирени, бидејќи државата има повеќе решенија за оваа состојба.
Најави дека уштее вечерва ќе се обиде да има дополнителни разговори со Американците, но дека не верува оти тие ќе ја променат својата одлука. Посочи и дека не очекува НИС да ја добие лиценцата од САД, со што рафинеријата од вторник ќе престане со работа.
Утре, како што додаде, има важен состанок за НИС, додавајќи дека Србија сè уште има тешка борба во овој процес.
Посочи дека не ја разбира логиката и тактиките на САД во однос на НИС и со продолжување на дозволата за работа на компанијата.
Инаку, Србија побара да се обнови лиценцата за работа на „Нафтената индустрија на Србија“ (НИС), додека во тек се преговорите за промена на сопственоста во оваа компанија под санкции на САД.
Според него, на САД им е пренесено дека ги почитуваат нивните санкции и оти разбираат дека е потребно да се промени сопственоста во НИС, како и дека тоа ќе се случи за педесет дена, со оглед што државата Србија им дава гаранции дека тоа ќе се случи во дадениот рок.
Американските санкции врз НИС стапија на сила на 9 октомври во обид на американската администрација да ја спречи Русија да ги користи приходите од енергија за војната во Украина. Тие санкции претходно беа одложени осум пати.
Во 2008 година, Србија продаде 51 процент од акциите на компанијата НИС на руската државна компанија „Газпром нефт“ за цена од 400 милиони евра, без тендер.
Во меѓувреме, сопственичката структура на НИС е променета неколку пати, но таа сè уште е претежно во рацете на руски компании, додека Србија има 29,87 отсто од акциите.
Вучиќ рече дека е речиси сигурен дека американскиот претседател Доналд Трамп не е запознаен со деталите, но дека многу високи функционери во Стејт департментот се свесни за состојбата со НИС и дека ова е очигледно политика што ја поддржуваат.
Според него, Србија има гасен аранжман со Русија до 1 јануари, како и дека ќе се обиде повторно да разговара за неговото продолжување.
„Ќе се бориме и ќе се обидеме да ги зачуваме пријателските односи каде што можеме, и партнерските односи каде што можеме“,
кажа тој.
Со децении, Србија е зависна од рускиот гас, од кој задоволува повеќе од 80 проценти од своите енергетски потреби.