Јавен обвинител процени дека за првообвинетиот, кој има македонско и бугарско државјанство, постои реален ризик од бегство и опасност да го изврши делото со кое се заканува, па до судија на претходна постапка од кавадаречкиот суд поднесе посебен предлог за определување мерка притвор
Основното јавно обвинителство (ОЈО) Кавадарци поднесе обвинение против три лица што преку социјалната мрежа Фејсбук, но и по телефон му се заканувале на градоначалникот на Општина Кавадарци, Митко Јанчев.
Како што информираат од Обвинителството, тројцата обвинети се товарат за кривичното дело – загрозување на сигурноста, а првообвинетиот и за продолжено дело – ширење расистички и ксенофобичен материјал по пат на компјутерски систем.
Во описот на предметот, од Обвинителството велат дека првообвинетиот во подолг временски период на неговиот личен фејсбук-профил пишувал објави со говор на омраза, навреди, повици за насилство и закани насочени кон градоначалникот на Кавадарци, поттикнувајќи омраза врз основа на политичка припадност и општествен статус.
„Обвинетиот 32-годишник објавувал и фотографии од оштетениот и неговите малолетни деца, заканувајќи се и кон нив“,
се вели во обвинението.
Како потврда за сериозната на заканите, според Обвинителството, на Фејсбук споделувал и видеа во кои самиот пука со автоматска пушка и пиштол.
„Од јули годинава почнал преку телефонска апликација да се јавува кај градоначалникот, па лично и преку пораки да упатува закани по неговиот и животот на неговото семејство“,
пишува во соопштението.
Второобвинетиот, исто така по телефон, пренесувал дел од пораките и заканите во име на првообвинетиот.
Третообвинетиот, пак, коментирал на објавите на фејсбук-профилот на првиот обвинет, заканувајќи му се на градоначалникот со негово убиство.
Јавен обвинител процени дека за првообвинетиот, кој има македонско и бугарско државјанство, постои реален ризик од бегство и опасност да го изврши делото со кое се заканува, па до судија на претходна постапка од кавадаречкиот суд поднесе посебен предлог за определување мерка притвор.