Од опозицијата велат дека не барале роднинско стебло, ниту извод од Димче Арсовски, туку да одговори на прашањата дали е роднински поврзан со основачот на фирмата „Дигитал оне“, формирана на крај на август лани, со само двајца работници, а која за една година има добиено тендери од скоро девет милиони евра
Сите вие во ВМРО-ДПМНЕ сте родници по криминал, а ние не се извинуваме на криминалци. Ова е одговорот од Социјалдемократски сојуз (СДСМ) до поранешниот портпарол на ВМРО-ДПМНЕ, Димче Арсовски, кој побара извинување и ги отфрли обвинувањата на опозицијата за негова поврзаност со фирмата која добила тендери во вредност од девет милиони евра.
„Скандалот што денеска го објавивме ги потврдува сите криминални шеми на ДПМНЕ како се крадат парите на граѓаните. Документите се јасни, тендери вредни речиси девет милиони евра се дадни на фирма со двајца вработени лица, формирана пред само една година. Четири од шест договори се добиени од Генералниот секретаријат на Владата на Мицкоски. Тоа е класична шема за испумпување на пари од граѓаните преку фирми блиски до власта“,
се вели во партиското соопштение.
Од опозицијата велат дека не барале роднинско стебло, ниту извод од Димче Арсовски, туку да одговори на прашањата дали е роднински поврзан со основачот на фирмата „Дигитал оне“, формирана на крај на август лани, со само двајца работници, а која за една година има добиено тендери од скоро девет милиони евра.
„Ниту Груевски и Мијалков не сее со исто презиме, па сепак се роднини“,
пишуваат од СДСМ.
Од СДСМ велат дека ќе продолжат со разоткривање на криминалот на владејачката партија. За утре најавија дека ќе објават нови аспекти од скандалот што денеска го обелоденија.
Арсовски во објава на Фејсбук напиша дека не е во роднинска врска и не ги познава сопствениците на фирмата „Дигитал оне“, која беше спомената на прес-конференцијата на генералниот секретар на СДСМ, Александар Саша Димитријевиќ.
„За да биде детално јасно, ниту го познавам човекот кој е сопственик на фирмата, ниту сум го сретнал, ниту знам како изгледа, ниту ми е роднина по било која основа. Единствено што е исто е презимето. Немам никаква врска со никаков тендер, ниту пак сум имал било каква врска со државни тендери“,
вели Арсовски.
На денешната прес-конференција, генераниот секретар на СДСМ Александар Саша Димитријевиќ обвини дека милионски тендери се доделуваат на фирми блиски до владејачката ВМРО-ДПМНЕ.
„Последниот договор е рамковна спогодба за софтверски лиценци за виртуелна платформа во вредност од 8 милиони евра. Како е можно за толку кратко време фирма со двајца вработени да добијат речиси 9 милиони евра? Ако ова не е класична шема за испумпување на парите на граѓаните преку фирми блиски до власта тогаш што е? И секако, едно од прашањата е дали Кристијан е во роднински врски со поранешниот портпарол на ДПМНЕ, Димса Арсовски,“
кажа тој.