Оттаму му порачаа дека за доброто на сите најдобро е Филипче да собере сила и да си замине од партијата
Од владејачката ВМРО-ДПМНЕ попладнево преку соопштение реагираат на денешните обвинувања на лидерот на Социјалдемократскиот сојуз (СДСМ), Венко Филипче, кој на прес-конференција рече дека Владата и нејзините лоши политики направија хаос во пензискиот систем, со што во ризик ја доведе нивната редовна исплата во следните месеци.
„Аман, Филипче, не грижи се. Заборави ли дека беше дел од владата на СДС, која на пензионерите им даваше некоја ситна сума од околу стотина денари, а во одреден период достигнуваше 1 000 денари или илјада и нешто“,
се вели во партиското соопштение.
Оттаму посочија и дека владата на другарот на Филипче, Заев, не само што не се грижеше за пензионерите туку со сумата што им ја даваше ги понижуваше и навредуваше.
„СДС е партија што никому не даваше повисоки примања, партија што шири лаги и дезинформации, партија на која апсолутно не и е грижа за никого и ништо во државата. СДС е партија во која поединци се грижат за личниот џеб“,
пишува во реакцијата од владејачката партија.
Од ВМРО-ДПМНЕ му порачаа дека за доброто на сите најдобро е Филипче да собере сила и да си замине од партијата.
Според Филипче, опозицијата повеќепати предупредуваше дека е потребно власта да се придржува до законското решение донесено во времето на СДСМ, кое предвидува правично зголемување на пензиите и одржливост на Фондот за пензиско осигурување (ПИОМ).
Посочи дека таквото законско решение е логично оти обезбедува доволно сума на пари за континуирано зголемување на пензиите согласно зголемувањето на трошоците за живот, согласно растот на минималната плата и согласно инфлацијата.
„Ние направивме 50 отсто усогласување со инфлацијата, 50 отсто усогласување со платите. А Владата донесе несоодветно решение. Ќе видиме сега, според одлуката на Уставниот суд, многу веројатно противуставно решение“,
рече тој.
Поради продлабочената буџетска дупка во Фондот за ПИОМ, како што вели тој, во неизвесност се ставени не само исплатите на сегашните, туку и на идните пензионери.
Филипче посочи и дека одржливоста на Фондот за ПИОМ е нарушена, а сметката е празна поради долгови кон Фондот за здравствено осигурување и кон приватните друштва.
Изминатите денови во јавноста актуелна е вербалната преписка меѓу Уставниот суд и премиерот Христијан Мицкоски, кој завчера во Собранието, за време на седницата за пратенички прашања, рече дека Уставниот суд веќе донел одлука за укинување на законската одредба за линеарно зголемување на пензиите и веќе од наредниот месец најголемиот број од пензионерите ќе добиваат помали пензии.