Лидерот на опозицијата потврди дека Спасовски меѓу двата круга од локалните избори побарал да се изземе од функцијата координатор на пратеничката група на партијата, но оти во меѓувреме се расчистиле недоразбирањата, за кои додаде дека биле од техничка природа
Лидерот на опозицискиот Социјалдемократски сојуз (СДСМ), Венко Филипче на денешната прес-конференција соопшти дека пратеникот Оливер Спасовски останува да биде координатор на пратеничката група на партијата во Собранието. Ова тој го рече, одговарајќи на новинарско прашање за неодамнешната изјава на пратеникот Спасовски, дека понудил оставка од функцијата координатор на пратеничката група на СДСМ, што немало врска со резултатот од локалните избори.
Филипче потврди дека Спасовски меѓу двата круга од локалните избори побарал да се изземе од функцијата координатор на пратеничката група на партијата, но оти во меѓувреме се расчистиле недоразбирањата, за кои додаде дека биле од техничка природа.
„Да, тоа се случи меѓу двата изборни круга. Причина беше едно недоразбирање од техничка природа, што во меѓувреме го расчистивмее. Ја разбирам неговата реакција во однос на тоа прашање, што доведе до една таква непријатна ситуација, а која не беше ниту намерна, ниту тендециозна. Разговаравме и по расчистување на тоа прашање, сепак Оливер Спасовски ќе остане координатор на пратеничката група на СДСМ“,
кажа Филипче.
На дополнително новинарско прашање за причините на недоразбирање со Спасовски, додаде дека станувало збор за некои технички детали околу начинот на споделување на тој документ со политичките партии.
Поранешниот министер за внатрешни работи и актуелен пратеник Оливер Спасовски во телевизиско гостување рече дека има вистина во тоа дека понудил оставка од функцијата координатор на пратеничката група на СДСМ кога требало да се поднесе резолуцијата за црвените линии со Бугарија до Собранието. Тогаш рече дека бил против таков чекор на партијата.
Инаку, Филипче денеска најави дека во текот на следната недела ќе заседаваат партиските тела и ќе бидат назначени двајца нови потпретседатели, а ќе се прават и измени во Извршниот одбор на партијата.
„Тоа ќе се случи во текот на следната недела“,
рече лидерот на СДСМ.
Овие промени доаѓаат откако по вториот изборен круг од локалните избори, оставка поднесе една од потпретседателите на СДСМ, Ана Чупеска.
Филипче најави дека од утре партијата почнува со серија прес-конференции за скандали на бизнис интереси поврзани со луѓе на власта.