Треба да се интервенира на околу шест илјади авиони произведени од оваа голема европска компанија, но, како што извести британската телевизија, кај повеќето од нив ќе биде потребна само едноставна надградба на софтверот
Производителот на авиони „Ербас“ издаде предупредување дека редовите за летање ќе бидат нарушени поради потребата за итни модификации на илјадници авиони, откако беше откриено дека засилената сончева радијација може негативно да влијае врз системите што прикажуваат податоци клучни за контролата на летање, објави Би-би-си.
Треба да се интервенира на околу шест илјади авиони произведени од оваа голема европска компанија, но, како што извести британската телевизија, кај повеќето од нив ќе биде потребна само едноставна надградба на софтверот.
Авијациските власти во Велика Британија, исто така, соопштиле дека надградбите многу веројатно ќе предизвикаат промени во распоредите за летање, па дури и откажување летови.
Според „Ербас“, проблемот бил забележан при неодамнешен инцидент во САД во кој биле вклучени авиони од типот А320. Компанијата им се извинила на патниците поради непријатностите.
На 30 октомври годинава, авион А320 на компанијата „Џет блу ервејс“ морал принудно да слета на Флорида поради ненадејно губење висина. Најмалку 15 луѓе биле повредени во инцидентот.
Со интервенциите ќе бидат опфатени не само авионите А320, кој е најпродаваниот модел на „Ербас“, туку и другите модели со сличен дизајн, како А318, А319 и А321.
Кај околу 5 100 авиони, проблемот можел да се реши со софтверски интервенции, но кај другите, кои се постари верзии, ќе треба да се инсталира и нова опрема, што ќе значи дека ќе се повлечат додека не се поправат и надградат.
„Ербас“ соопштил дека ова ќе доведе до „оперативни нарушувања за патниците и за клиентите“, и издал извинување.
Компанијата „Визер“ информирала дека ќе треба да се интервенира кај некои од нејзините авиони, поради што веднаш за нив биле закажани сервиси, а фирмата „Ер Индија“ соопштила дека директивата од „Ербас“ може да предизвика доцнења.
„Бритиш ервејс“ рекле дека нема да бидат многу погодени од проблемот, а „Изиџет“ дека тоа може да предизвика „некакви нарушувања“, за кои навремено ќе ги информираат патниците.
„Безбедноста е нашиот најголем приоритет и ние ги управуваме авионите согласно строгите правила од производителите“,
рекле од „Изиџет“.
Проблемот со авионите се состои во тоа што силната сончева и космичка радијација на големи височини може да го наруши работењето на ЕЛАК-компјутерот, кој ги контролира аеродинамичните делови што се користат за кревање, спуштање и за свртување на леталата.
Моделот А320 е познат како авион што „лета преку жица“, што во индустрискиот жаргон значи дека не постои директна механичка контрола меѓу пилотската кабина и деловите од леталото што го регулираат неговото движење, односно сето тоа се управува преку компјутер.
Агенцијата за авијациска безбедност на Европската Унија (ЕАСА) издаде итна директива со која им наредува на авиокомпаниите да ги заменат ЕЛАК-компјутерите на авионите што се најтешко погодени од овој проблем, пред повторно да ги вклучат во превозот на патници.