Во својот исказ пред јавниот обвинител, жената потврдила дека подолг временски период била жртва на физичко и психичко семејно насилство од сопругот, но не се осмелувала тоа да го пријави
Основното јавно обвинителство Струмица донесе наредба за спроведување истражна постапка против едно лице осомничено дека сторило кривично дело убиство во обид.
Осомничениот 48-годишник, како што информира Јавното обвинителство, при вршење семејно насилство, на 26 ноември годинава во семејниот дом во селото Просениково, се обидел да убие својата сопруга. Тој ја фатил за главата и со шприц се обидел насилно да ѝ вбризга во устата одредена течност, најверојатно пестицид. Жртвата почнала да го турка и да вика, а тоа го слушнале нивните две малолетни деца кои дошле од другата соба и се обидувале да ја одбранат мајка си.
Оштетената успеала да влезе во бањата, но осомничениот влегол по неа, ја турнал во кадата и ја притиснал со коленото, па со нож започнал да ѝ нанесува исеченици на вратот во близина на каротидната артерија. Децата повикале други роднини кои успеале да го оттргнат.
Во својот исказ пред јавниот обвинител жената потврдила дека подолг временски период била жртва на физичко и психичко семејно насилство од сопругот, но не се осмелувала тоа да го пријави.
Според јавниот обвинител постои реална опасност осомничениот повторно да врши семејно насилство и да го доврши обиденото дело. Исто така, постои опасност од бегство и можност тој да влијае на сведоците на настанот, негови блиски роднини кои ѝ помогнале на оштетената и ја однеле во болница.
Од тие причини, како што се наведува, јавниот обвинител до судијата на претходна постапка доставил предлог за определување мерка притвор.