„Нашиот став беше и останува јасен дека е потребна сеопфатна комисија, избегнувајќи каков било селективен или политички мотивиран пристап и токму таква комисија се формира“, се вели во коалициското соопштение
Владејачката коалиција ВЛЕН целосно го поддржува формирањето анкетна комисија, која ќе ги испита сите сериозни случаи што ја потресоа земјата низ годините, од „Дурмо турс“ и „Беса транс“ до Модуларната болница во Тетово и трагедијата во Кочани.
Овој став, коалицијата ВЛЕН денеска го соопшти до медиумите, посочувајќи дека граѓаните со години се оставени без одговори, а таа практика мора да заврши.
„Нашиот став беше и останува јасен дека е потребна сеопфатна комисија, избегнувајќи каков било селективен или политички мотивиран пристап и токму таква комисија се формира. Сега комисијата сериозно ќе ги испита и со широк мандат сите сериозни случаи што ја потресоа земјата низ годините, од ‘Дурмо турс‘ и ‘Беса транс‘ до Модуларната болница и трагедијата во Кочани“,
се вели во соопштението од оваа коалиција.
Според ВЛЕН, само таков сеопфатен пристап може да ги истакне неуспесите и институционалните празници што одзедоа животи.
Оттаму очекуваат оваа комисија да ги истакне не само индивидуалните неуспеси, туку и моделите на лошо управување што дозволија последователни трагедии низ годините.
Претседателот на Собранието, Африм Гаши, пред два дена соопшти дека иницијативата за формирање анкетна комисија во парламентот за трагедијата во т.н. кабаре „Пулс“ во Кочани, што минатата недела ја поднесе Социјалдемократскиот сојуз (СДСМ), а на која се придружи и Левица, ќе биде вратена на доработка затоа што има недостатоци.
Според него, штом недостатоците бидат коригирани, иницијативата ќе биде веднаш ставена во процедура.
И пратеничките групи на ВМРО-ДППМНЕ, ВЛЕН и ЗНАМ, кои стојат зад иницијативата, исто така предлагаат формирање анкетна комисија. Но, освен за трагедијата во Кочани, тие бараат на неа да бидат разгледани и претходните случаи, за кои од владејачкото мнозинство сметаат дека не добиле соодветна правна разрешница.
Освен пожарот во „Пулс“, владејачкото мнозинство бара на анкетната комисија да бидат разгледани и случаите со автобуските несреќи на „Дурмо турс“ и „Беса транс“ и пожарот во модуларната болница во Тетово.