Трамп рече дека двајца припадници на Националната гарда се критично ранети, како и дека виновникот ќе се соочи со тешки последици
Двајца припадници на американската Национална гарда се ранети вечерва во близина на Белата куќа во Вашингтон, информираат американските медиуми.
Пукањето се случило во областа во близина на метро станицата Фаргат, недалеку од Белата куќа, пренесува „Гардијан“.
Метрополитенската полиција на Вашингтон објави дека местото на настанот е безбедно и дека еден осомничен е во притвор.
На граѓаните им е советувано да ја избегнуваат областа.
Се уште не се познати околностите што доведоа до пукањето.
Бројни возила на службите за итни случаи веднаш пристигнале на местото на настанот.
Претседателот Доналд Трамп е информиран за инцидентот, а кратко по нападот се огласи и на неговата мрежа Трут соушл, соопшти неговата портпаролка Каролин Ливит.
„Белата куќа е свесна за оваа трагична ситуација и активно ја следи. Претседателот е известен“,
кажа таа.
Трамп рече дека двајца припадници на Националната гарда се критично ранети, како и дека виновникот ќе се соочи со тешки последици.
„Тие ќе платат многу висока цена“,
напиша тој.
Инцидентот се случува во време кога распоредувањето на припадници на Националната гарда во американската престолнина предизвика контроверзии, откако администрацијата на Доналд Трамп нареди нивно испраќање во Вашингтон.