Погледнете го новото дебатно издание на емисијата „360 степени”, емитувано на 24 ноември 2025 г. на МРТ 1, во кое гостува државниот јавен обвинител Љупчо Коцевски
Освен во сметководство, драматичен кусок на кадри има и кај информатичарите, кои се само четворица за цело Јавно обвинителство во државата, вели државниот јавен обвинител Љупчо Коцевски, кој гостува во новото издание на емисијата „360 степени“ на МРТ 1. Не бараме повеќе пари за повисоки плати, туку за останатите потреби и трошоци на Јавното обвинителство, додава тој. Темата за буџетите на судството и на јавното обвинителство доби на значење со извештајот на Европската комисија во кој Брисел посочи на финансиска зависност на правосудството и на притисок од Владата и од Собранието врз оваа власт. Коцевски го прашуваме дали ако тој замине, власта ќе се согласи со поголем буџет за јавното обвинителство, колку е задоволен од својата работа и дали треба да си оди, како што смета премиерот Христијан Мицкоски. Во интервјуто разговараме за судскиот процес и за двете истраги за пожарот во Кочани, како и за други актуелни случаи – оној во кој е осомничен поранешниот прв вицепремиер Артан Груби и оној во кој е осомничен Борче Марковски, сопственик на „Марковски компани“ (прашуваме дали е отворен сефот на Марковски во Србија). Тема се и спорните масовни легализации на дивоградби во Општина Чаир и тврдењата на поранешната градоначалничка на Скопје дека дел од нив се спроведени со фалсификувана документација.