Ексминистерката во објава на Фејсбук вели дека иако поминале речиси пет години од поднесувањето на апликацијата пред ЕСЧП, сознанието дека Судот во Стразбур ги препознал повредите за неа е „една мала лична сатисфакција“
Премиерот Христијан Мицкоски денеска, одговарајќи на новинарски прашања, го коментираше случајот „Тенк“, односно постапката што ја отвора ЕСЧП, наведувајќи дека тоа е доказ за големите проблеми во македонското правосудство.
Европскиот суд за човекови права (ЕСЧП) во Стразбур отворил постапка по жалбата на поранешната министерка за внатрешни работи, Гордана Јанкулоска, за случајот „Тенк“, односно за набавката на блиндираниот „мерцедес“ за потребите на државата.
Судот ќе оценува дали во постапката што се водеше против Јанкулоска, а во која таа беше осудена на затворска казна од четири години, постојат индиции дека било прекршено правото на фер судење во Македонија.
Веста за отворањето на постапката од страна на ЕСЧП ја соопшти ексминистерката во објава на социјалните мрежи.
„Европскиот суд за човекови права денес објави дека отвора сериозни прашања во однос на документираните повреди на правото на правично судење во предметот против мене, за набавката на блиндирано возило за потребите на државата“,
напиша Јанкулоска на својот фејсбук-профил.
Дел од медиумите објавија дека еден од клучните аспекти за кои интерес пројавил Судот во Стразбур е користењето на прислушуваните разговори како доказ.
Одбраната тврди дека Јанкулоска немала можност да ја оспори нивната автентичност, ниту имала пристап до целата документација, што ја нарушило рамноправноста на странките.
Дополнително, Судот го анализира влијанието на судијката Добрила Кацарска, која го судеше предметот во прв степен. Според пишувањето на медиумите, се проверува дали нејзини претходни јавни изјави можеле да создадат впечаток на предвремено определување на вината на Јанкулоска.
Во жалбата што Јанкулоска преку нејзиниот адвокат и сопруг, Влатко Илиевски, ја поднесе до Стразбур, се наведува дека еден поротник не учествувал во советувањето и гласањето, а во второстепената постапка на Врховниот суд биле заменети двајца судии без јасно образложение, пренесе „Дојче веле“ на македонски јазик.
Ексминистерката Јанкулоска во објавата на Фејсбук напиша дека прашањата што ги отвора ЕСЧП не се само потврда за неправдата што била сторена кон неа од страна „на инсталациите на претходната власт во правосудството“, туку и потврда дека токму тие инсталации биле „најмоќната алатка за остварување на целите на таа влада. Таа додава дека иако поминале речиси пет години од поднесувањето на апликацијата пред ЕСЧП, сознанието дека Судот во Стразбур ги препознал повредите, за неа е „една мала лична сатисфакција“.
„Можеби конечно оние со 2% доверба ќе ја примат пораката дека не смеат да слугуваат на ничии интереси и агенди затоа што граѓаните ги плаќаат да ги штитат, а не да ги кршат нивните права. Се надевам дека конечно ќе има одговорност за сите сторени зла, но и ако тоа не се случи, немам дилема дека никој не може да му избега на судот на историјата“,
наведува Јанкулоска.
Премиерот Христијан Мицкоски денеска, одговарајќи на новинарски прашања, го коментираше случајот „Тенк“, односно постапката што ја отвора ЕСЧП, наведувајќи дека тоа е доказ за големите проблеми во македонското правосудство.
„Да, утрово го прочитав тоа. Забележав дека во соопштението јасно стои дека имаат забелешки на процесот, начинот на судењето и дека отвораат предмет да го разгледаат тој процес, да преразгледаат нарушување на човекови права итн.“,
рече премиерот одговарајќи на прашањето „Дали сте запознаени со тоа дека Стразбур отвора предмет за апликацијата на Гордана Јанкулоска, која беше осудена во случајот ‘Тенк’“?
Според Мицкоски, станува збор за случаи за кои тие зборуваат подолго време, а зад кои стојат малкумина судии, кои, како што рече, се „партиски октроирани и заробени од претходната влада, предводена од СДСМ и ДУИ“.
„Тоа се овие судии на кои им е мала плата, сакаат двојно, тројно поголема, партиски октроирани и заробени од минатата влада“,
рече премиерот.
Говорејќи за случајот „Тенк“, Мицкоски рече дека судијата што го водел овој предмет сега се наоѓа на висока позиција и продолжува да носи политички одлуки спротивни на интересите на граѓаните.
„И не престанува тој судија, сега ги атакува пензионерите за линеарното зголемување на пензиите, сака тоа право да им го одземат, а од друга страна бараат двојно, тројно поголеми плати, а гледате какви пресуди, политички октроирани носат. За жал, мораме да се срамиме и да црвенееме пред Стразбур поради ваквите малкумина судии коишто за жал го контаминираат нашето судство и малкумина обвинители кои за жал го контаминираат нашето обвинителство“,
рече Мицкоски.
Тој рече оти смета дека реформи во делот на судството и обвинителството се апсолутно потребни, но тие, како што додаде, треба да бидат суштински, а не само зголемување на платите на судиите.
Ексминистерката Јанкулоска од септември 2020 година почна да ја издржува затворската казна за „Тенк“, откако пресудата стана правосилна.
По три години и еден месец, таа на 1 ноември 2023 година излезе од затвор откако Апелацискиот суд во Скопје ја уважи нејзината молба за условен отпуст од натамошно издржување на затворската казна.
Во истиот случај е осуден и експремиерот Никола Груевски, кој избега во Унгарија.