На Конгресот од 1908 година, посочи Мицкоски, албанската интелигенција го направила крупниот чекор кон создавање на унифицирана азбука, темел на јазичната и културна кохезија на Албанците. Тоа беше чин со длабоко европско значење, чин на модернизација образование и отвореност
Само ако сме обeдинети во почит, доверба и одговорност ќе можеме да постигнеме резултати што ќе ја движат татковината напред, порача денеска премиерот Христијан Мицкоски, обраќајќи се на свечената седница на Владата по повод Денот на албанската азбука „22 Ноември“.
Премиерот го честита на Денот на албанската азбука, кој, како што рече, носи силна историска и културна симболика.
На Конгресот од 1908 година, посочи Мицкоски, албанската интелигенција го направила крупниот чекор кон создавање на унифицирана азбука, темел на јазичната и културна кохезија на Албанците. Тоа беше чин со длабоко европско значење, чин на модернизација образование и отвореност. Во периодот кога Балканот минуваше низ тешки прдизвици, Битолскиот конгрес покажа дека силата на едно општество произлегува од знаењето, јазикот и вербата во иднината.
„Овој ден е важен и за нашата држава. Македонија е дом на различности кои не разделуваат, туку ја збогатуваат нашата заедничка национална приказна. Албанската заедница со својата култура, јазик, традиција и вредности е суштински дел од нашата држава. Денес кога го одбележуваме Денот на албанската азбука, оддаваме признание на генерации кои се бореле за образование, писменост и културен развој, но и на сите кои денес го продолжуваат тој пат“,
рече Мицкоски.
Тој рече дека татковината се темели на идејата дека секој граѓанин има еднакво место, вредност и можност.
„Владата останува посветена на политики кои градат меѓуетничка доверба, создаваат простор за достоинствен развој на јазиците и културите и ја зајакнуваат кохезијата, меѓу сите наши граѓани. Имаме амбиција и сакаме да градиме општество во кое младите Македонци, Албанци, Турци, Срби, Бошњаци, Роми, Власи и сите други, ќе ја гледаат својата иднина тука во силна и развиена таковина. Општество во кое секој јазик е мост, а не граница, сила – а не поделба, богатство – а не предизвик“,
рече премиерот Мицкоски.
Според него, Владата активно работи на проекти кои создаваат подобар живот за сите граѓани, без разлика на нивната етничка припадност, како и на унапредување на инфраструктурата и можности во секоја општина, на модернизацоја на училишта, поддршка на културни институции и отворање нови можности за младите.