Најмногу отпуштени лица во ЈП „Паркови и зеленило“ и во ЈП „Комунална хигиен“, а отстранети лица има и во ЈП „Дрисла“, „Водовод и канализација“ и други јавни претпријатија“, рече новоизбраниот градоначалник на Скопје во вечерашното гостување во централниот дневник на ТВ Сител
Новиот градоначалник на Скопје, Орце Ѓорѓиевски најави промени во менаџерските тимови на сите јавни претпријатија и институции што се под надлежност на Град Скопје, а за новите кадровски решение, како што кажа во вечерашното гостувањето во централниот Дневник на ТВ Сител, ќе информира во наредните денови.
Според Ѓорѓиевски, природно и логично е секој човек со себе да донесе луѓе со коишто сака да работи и да функционира.
„Така што во наредните денови ќе добиете детали околу кадровските промени коишто ќе бидат направни во Градот Скопје, во јавните претпријатија, културните установи, средните училишта и сè останато поврзано со тоа“,
рече тој.
Прашан за отпуштените 371 лице од јавните претпријатија во Градот, Ѓорѓиевски рече дека тоа толку лица се отстранети само првиот ден, додека заклучно со денешниот ден, бројката изнесува околу 500 луѓе за кои било утврдено дека земале плата, а не доаѓале на работа.
Тој говореше и за начинот на кој дошле до овој број вработени, кои, како што кажа, се однесувале дивијатно, и поради кои, Градот бил оштетен за околу 20 милиони евра само во изминатите четири години. Според Ѓорѓиевски станува збор за сума со кој може да изгради нов Лунапрк во главниот градл, што беше и едно од неговите предизборни ветувања.
„Има систем за евиденција во кој треба да се евидентира секој вработен. Тоа е најлесен начин да се одреди оваа дивијатна појава и тоа не е работа која јас сум ја утврдил, ја утврдувале и во минатото и други, но за жал, дали немале храброст, дали немале намера, не го направиле тоа. Инаку, сакам да појаснам дека 500 луѓе значат пет милиони евра годишно или во превод за четири тоа изнесува 20 милиони евра“,
рече новоизбраниот градоначалник на Скопје.
Освен што се отуштени од работа, Ѓорѓиевски кажа дека веќе се консолтурал со експерти кои ќе работата на тоа овие средства да бидат вратени, но да има и одговорност и за раководителите на секторите и за директорите кои што потпишувале и кои го овозможиле целиот тој процес.
Како што кажа градоначалникот, најмногу отстранети лица има во ЈП „Паркови и зеленило“ и во ЈП „Комунална хигиен“, а отпуштени има и во ЈП „Дрисла“, „Водовод и канализација“ и други јавни претпријатија.
„Значи секаде имало ваков тип појави. И таму не станува збор само за три дена отсуство од работа, станува збор за неколку месеци, а за некои лица и години. Така што јас нма да имам толеранција кон никого“,
рече Ѓорѓиевски.
Во врска со ЈП „Комунална хигиена“, тој рече останува на ставот дека претпријатието треба да биде расформирано и поделено по општини согласно потребите и бројот на жители, но за ваков потег, како што додаде во моментот нема услови, бидејќи претпријатието располага со многу малку механизација.
„Сега не сме подготвени за тоа, немаме можност затоа што ова јавно претпријатие има премала механизација и ќе предизвикаме дополнителен хаос. Таа идеја не ја отфрлам откако ќе се зајакнат капацитетите“,
рече градоначалникот на Скопје.
Прашан за јвниот градски превоз, тој кажа дека пуштањето на 55 автобуси на приватните превозници е врз основа на одлука донесена од Советот на Град Скопје во минатото, што не била испочитувана.
„Тоа се возила кои некој од невнимание во минатото не дозволил да возат за граѓаните. Некој требало да потпише за тие возила за кои одлука има донесено Советот на Град Скопје во минатото, Тоа е рамка според која околу 200 автобуси од приватните превозници треба да бидат вклучени в сообраќај. Поради невнимание, единствено 40 до 50 автобуси возеле во изминатиот период. Значи квотата не била испочитувана“,
рече Ѓорѓиевски.
На прашање на истата тема, тој соопшти дека долгот на ЈСП кон приватните превозници е три милиони евра и дека се работи на тоа средствата да бидат обезбедени и да се договори начинот на исплата.
За Јавното сообраќајно претпријатие „Скопје“, Ѓорѓиевски рече дека работи со десеткуван возен парк, кој очекува да биде пополнет во март следната година автобусите што ги најави Владата и Министерството за транспорт.
„Возниот парк ќе биде обновен. Во март треба да пристигнат 80 еколошки автобуси за Скопје преку Владата и Министерството за транспорт, и уште 70 мислам за останатите градови низ Македонија“,
кажа тој.
Прашан што очекува од седницата што треба да се одржи в петок, а на која точка на дневен ред е прекројување на градската каса и дали смета на поддршка од советниците, Ѓорѓиевски рече дека не може да говори за тоа од колку советници ќе има поддршка, посочувајќи дека ВМРО-ДПМНЕ има апсолутно мнозинство во Советот.
„Но, не ја исклучивам можноста да се приклучат и други советници во наредниот период, затоа што ние ќе носиме одлуки од интерес на граѓаните и ќе ми биде драго тие да се носат едногласно. И со советниците ќе се разговара, ќе се прифаќаат остварливи иницијативи и верувам дека ќе имаме одлична соработка во наредните четири години. Ниту јас гледам непријател во дел од советниците, ниту пак тие треба да гледаат непријател во мене. Заедно треба да се бориме да реализраме што е можно повеќе проекти за нашите сограѓани“,
рече новоизбраниот градоначалник на Скопје.