Почнувајќи од утре, домашните летови ќе бидат намалени за четири отсто, а во следните два дена, односно во сабота и недела за дополнителни пет и шест отсто, додека не се дојде до целосни 10 проценти следната недела, објави Ројтерс, повикувајќи се четири неименувани извори
Соединетите Американски Држави (САД) почнувајќи од утре за 10 проценти ќе го намалат капацитетот на воздушниот сообраќај на 40 главни аеродроми во земјата, доколку продолжи блокадата на федералната влада, предупреди министерот за транспорт на САД, Шон Дафи, пренесоа светските медиуми.
Одлуката, меѓу другото, доаѓа и затоа што контролорите на летање, кои повеќе од еден месец немаат земено плата, почнале да пријавуваат замор, изјавил шефот на Федералната администрација за воздухопловство (ФАА), Брајан Бредфорд, на заедничката прес-конференција со министерот, оценувајќи ја ситуацијата како невообичаена.
„Невообичаено е, исто како што е невообичаено затворањето (блокадата на федералната влада), исто како што е невообичаен фактот дека нашите контролори немаат земено плата еден месец“,
вели Бредфорд.
Како што наведува Би-би-си, околу 1,4 милиони федерални работници, од контролори на летање до чувари на паркови, работата без плата или се на принуден одмор, бидејќи републиканците и демократите во Конгресот сè уште не можат да се договорат околу федералниот буџет.
Синдикатите на службите погодени од блокадата велат дека многу од вработените се разболуваат од стрес или се принудени да бараат втора работа за да ги покријат трошоците за живот. Тоа, според синдикатите, се должи на финансискиот притисок што го чувствуваат работниците од најдолгата блокада на федералната влада во историјата на САД.
Што се однесува до намалувањето на бројот на летови, тоа ќе биде постепено. Почнувајќи од утре, домашните летови ќе бидат намалени за четири отсто, а во следните два дена, односно во сабота и недела за дополнителни пет и шест отсто, додека не се дојде до целосни 10 проценти следната недела, објави Ројтерс, повикувајќи се четири неименувани извори.
Имињата на аеродромите кои ќе работат со намален капацитет треба да бидат објавени денеска, а ситуацијата, според проценките би можела да опфати помеѓу 3 500 до 4 000 летови дневно.
Министерот за транспорт на САД, Шон Дафи вели дека одлуката за намалување на летовите се носи за да одржи безбедноста и ефикасноста на воздушниот сообраќај.
Според шефот на ФАА, пак, доколку блокадата на федералната влада продолжи и доведе до поголем притисок врз системот, можни се дополнителни рестриктивни мерки.
Компанијата „Американ ерлајнс“, која е втор по големина авиопревозник во Северна Америка, соопштија дека чекаат дополнителни информации од ФАА за да можат да излезат со податоци кои летови ќе бидат откажани.
Сепак, како што се додава во соопштението, компанијата очекува дека најголем број од нивните клиенти нема да бидат погодени од најавените рестрикции.
Портпаролот на „Саутвест ерлајнс“, четвртиот по големина авиопревозник, изјавил дека компанијата сè уште проценува како ограничувањата на летовите ќе влијаат на нејзините услуги, најавувајќи дека наскоро ќе излезат со известување за нивните корисници.
„Продолжуваме со повиците до Конгресот веднаш да го реши проблемот со блокадата и да го врати националниот систем за воздушен сообраќај во неговиот полн капацитет“,
додал портпаролот.
Дел од останатите авиокомпании одбиле да ја коментираат ситуацијата за британскиот национален сервис.
Блокадата на федералната влада почна на 1 октомври, поради што голем број работници во службите на федерално ниво беа испратени на принуден одмор, а оние што работат во дејности кои се сметаат за неопходни, како што се контролорите на летање, мораа да продолжат да работат без плата.
Претседателот на синдикатот што претставува повеќе од 20 000 работници во воздухопловството, Ник Даниелс, вчера на остар начин ја коментираше ситуацијата, наведувајќи конкретни примери.
„Контролорите на летање испраќаат пораки: ‘Немам доволно пари ниту да ставам бензин во мојот автомобил за да дојдам на работа’. Она што го правиме секојдневно го базираме на предвидливост. Во овој момент нема предвидливост“,
вели Даниелс за Си-ен-ен.
Инаку, министерот за транспорт, Дафи уште на почетокот на оваа недела најави дека е можно воведување рестриктивни мерки, бидејќи половина од 30 главни аеродроми во земјата се соочуваат со недостиг на персонал.
Претходно тој рече дека постои ризик контролорите на летање да бараат друга работа за време блокадата, заканувајќи се со отпуштање од работа на сите контролори кои нема да се појават на своите работни места.
„Тие мора да донесат одлука: Дали да одам на работа и да не добијам плата и да не ставам храна на масата? Или да возам за ‘Убер“ (Uber) и „Дордаш“ (DoorDash) или да послужувам маси?“,
рече Дафи за Еј-би-си во неделата.