Зборувајќи во Мајами на Американскиот бизнис форум, Трамп рече дека победата на Мамдани, кого го нарече „комунист“, ги одразува политиките на демократите во Конгресот
Американскиот претседател Доналд Трамп го даде својот прв коментар во врска со победата на Зохран Мамдани на изборите за градоначалник на Њујорк, обвинувајќи ги демократите за „екстремизам“ и тврдејќи дека резултатот покажува што, според неговите верувања, Демократската партија сака да направи со земјата.
Зборувајќи во Мајами на Американскиот бизнис форум, Трамп рече дека победата на Мамдани, кого го нарече „комунист“, ги одразува политиките на демократите во Конгресот.
„Ако сакате да видите што демократите во Конгресот сакаат да направат со Америка, само погледнете ги резултатите од вчерашните избори во Њујорк, каде што нивната партија постави комунист за градоначалник на најголемиот град во земјата. Се сеќавате кога реков дека никогаш нема да имаме социјалист на ниедна функција во нашата земја? Тоа е она што го реков… ги прескокнавме социјалистите, ги поставивме комунистите“,
рече Трамп.
Тој додаде дека „Мајами наскоро ќе биде засолниште за луѓето што бегаат од комунизмот во Њујорк“, тврдејќи дека демократите се „толку екстремни“.
„Ќе видиме како ќе испадне. И ќе им помогнеме. Ќе им помогнеме. Сакаме Њујорк да биде успешен. Можеби ќе им помогнеме малку“,
додаде тој.
Неговите коментари се првиот суштински јавен одговор на изборниот резултат откако Мамдани ги победи републиканецот Кертис Слива и поранешниот гувернер Ендру Куомо, кој овој пат влезе во трката како независен кандидат. Трамп јавно го поддржа Куомо еден ден пред затворањето на гласачките места.
Порано во текот на денот, за време на обраќањето во Белата куќа, Трамп не ја спомена директно победата на Мамдани. Тоа се промени вечерва со говорот во Мајами.
„По резултатите од синоќа, одлуката пред Американците не можеше да биде појасна, ние избираме помеѓу комунизмот и здравиот разум. И додека сум во Белата куќа, Соединетите Американски Држави нема да станат комунистички на никаков начин, во никаков облик“,
рече тој.
Претходно, новоизбраниот градоначалник на Њујорк, Зохран Мамдани, на првата прес-конференција, рече дека неговата администрација ќе застане во одбрана на градот против американскиот претседател Доналд Трамп.
Тој додаде дека е отворен за разговор со Трамп, без разлика дали тоа ќе биде за неговите предизборни ветувања поврзани со трошоците за живот или за последиците од намалувањето на федералните субвенции за храна (SNAP), кои влијаат на речиси два милиони жители. Тој нагласи дека секогаш ќе ја кажува вистината за постапките на Трамп, но без да ја затвори вратата за дијалог бидејќи, како што вели, ова не е личен конфликт.
На прашањето што треба да научи Трамп од резултатите од синоќа, Мамдани рече дека претседателот не ги исполнил своите ветувања кон работничката класа.