Суспендирани се фудбалерите Орхан Демири, Ердин Арифи и Бехар Демири од Беса поради, како што наведуваат од Фудбалската федерација, физички напад и обид за линч на противнички фудбалер по завршување на натпреварот
Дисциплинската комисија на Фудбалската федерација на Македонија (ФФМ) донесе одлука за доживотна суспензија на тројца фудбалери од Фудбалскиот клуб Беса од Слупчане поради нападот врз играчи на скопски ФК Аеродром за време на натпреварот во рамки на осмото коло од Третата лига – Север, oдигран минатиот викенд.
Суспендирани се фудбалерите Орхан Демири, Ердин Арифи и Бехар Демири од Беса поради, како што наведуваат од ФФМ, физички напад и обид за линч на противнички фудбалер по завршување на натпреварот.
Теренот на ФК Беса во Слупчане, на кој се одигра спорниот меч, ќе биде суспендиран на десет натпревари, а фудбалскиот клуб дополнително треба да плати парична казна согласно дисциплинскиот правилник.
„Фудбалската федерација на Македонија најостро го осудува секој облик на насилство на фудбалските терени и ќе продолжи со доследна примена на сите дисциплински прописи, со цел заштита на интегритетот на натпреварите и безбедноста на сите учесници во фудбалот. Во фудбалот нема место ниту милост за оние што се подготвени да тепаат, линчуваат и го нарушуваат угледот на фудбалот“,
велат од ФФМ.
Оттаму дополнително наведуваат дека дисциплинскиот комесар на Третата лига – Север ги повикува сите кои располагаат со дополнителен видеоматеријал или друга релевантна доказна содржина поврзана со инцидентот, да го достават за потребите на дисциплинската постапка.