Министерот за здравство Азир Алиу рече дека хипербарната кислородна терапија им помага на пациентите со хронични рани и рани што тешко заздравуваат, како што се дијабетично стапало, изгореници, состојби со нарушена микроциркулација и други индикации што ги третираат повеќе медицински специјалности
Градската општа болница (ГОБ) „8 Септември“ во Скопје наскоро на Одделот за физикална медицина и рехабилитација ќе ја стави во функција новата хипербарна комора наменета за лекување на пациенти со хронични рани кои тешко заздравуваат, дијабетично стопало, изгореници, состојби со нарушена микроциркулација, но и за спортисти.
Комората ќе им биде на располагање и на Пластична хирургија, Дерматологија, Пулмологија и останатите оддели.
„Услугата најчесто ќе ја користат пациентите со хронични рани, кои тешко заздравуваат, дијабетично стопало, изгореници, но исто така и од пластична хирургија, пулмологија, сегментите кои работат на зајакнување на имунитетот и не само пациенти, туку и здрави спортисти кои понатаму преку проектите што ги планираме ќе бидат користени за зајакнување на нивните спортски перформанси. За кратко време ќе стане достапна за пациентите“,
вели директорот на ГОБ „8 Септември“, Синиша Стојкоски.
Премиерот Христијан Мицкоски, кој заедно со министерот за здравство беше во посета на болницата, рече дека комората е додадена вредност и е единствена од ваков тип во Македонија.
Министерот за здравство Азир Алиу рече дека хипербарната кислородна терапија им помага на пациентите со хронични рани и рани кои тешко заздравуваат, како што се дијабетично стапало, изгореници, состојби со нарушена микроциркулација и други индикации што ги третираат повеќе медицински специјалности.
„Ова е пример како со партнерства можеме да ја унапредиме јавната здравствена инфраструктура од аспект на модерна опрема која ќе го зголеми квалитетот на услугите кои ги добиваат пациентите. На овој начин директно влијаеме врз исходите на лекувањето, го намалуваме ризикот од компликации, престојот во болница и трошоците, а на пациентите им даваме поголема шанса за побрзо и поквалитетно оздравување“,
додаде Алиу.