„Семејствата на заложниците се известени за овој случај и во ова тешко време, нашите срца се со нив. Напорите за враќање на нашите заложници продолжуваат неуморно и нема да престанат додека не се врати и последниот заложник“, соопштија од канцеларијата на израелскиот премиер Бенјамин Нетанјаху
Хамас ги предаде телата на уште четворица починати заложници. Предавањето прво е извршено кон Црвениот крст, а потоа телата се испорачани и на Израелските одбранбени сили (ИДФ) и безбедносната агенција Шин Бет во Газа.
Нивната идентификација ќе се изврши во Националниот институт за судска медицина.
Израелските одбранбени сили (ИДФ) ја повикуваат јавноста да постапува во согласност со чувствителноста на процесот и да ја почека официјалната идентификација на телата, која прво ќе им биде соопштена на семејствата.
„Сите семејства на заложниците се известени за овој случај и во ова тешко време, нашите срца се со нив. Напорите за враќање на нашите заложници продолжуваат неуморно и нема да престанат додека не се врати и последниот заложник“,
соопштија од канцеларијата на израелскиот премиер Бенјамин Нетанјаху.
Досега, Хамас ги врати телата на осум починати заложници. Оттаму велат дека се обидуваат да пронајдат уште дваесет од нив.
Израел вчера се закани дека не го отвора граничниот премин Рафах меѓу Појасот Газа и Египет, што е пропишано со договорот за прекин на огнот во Газа, бидејќи палестинската милитантна група Хамас не ја исполни својата обврска да ги врати телата на сите мртви заложници што сè уште ги држи во Појасот Газа.
Хамас завчера ги ослободи преостанатите 20 живи заложници, кои беа киднапирани во напад врз јужен Израел во октомври 2023 година, и ги предаде телата на четворица мртви заложници.
Израелската војска потврди дека ги примила посмртните останки на четворица заложници и дека ќе спроведе форензички тестови за да го потврди нивниот идентитет.
Хамас соопшти дека станува збор за телата на Гај Илуз, Јоси Шараби, Бипин Јоши и Даниел Перец.
Што се однесува до преостанатите 24 починати заложници, од милитантната група тогаш изјавија дека немаат прецизни информации каде тие се погребани и оти им е потребно време да ги лоцираат местата.