Меѓудругото, ќе се разговара и за олеснување на рестриктивните мерки во меѓусебниот режим на движење
Министерот за надворешни работи Никола Димитров на покана на својот колега, министерот Ивица Дачиќ, утре ќе престојува во работна посета на Србија, што е прва на шефот на дипломатијата во странство од почетокот на пандемијата, во знак на натамошно развивање на пријателски дијалог и соработката меѓу двете соседни земји.
На средбата, како што соопшти МНР, предвидено е министрите да разменат мислења за актуелната состојба во билатерални односи и можностите за унапредување на соработката во сите области од заеднички интерес, со акцент на продлабочување на економската соработка.
Исто така, ќе стане збор и за искуствата во врска со справувањето со пандемијата, како и чекорите за релаксирање на рестриктивните мерки во меѓусебниот режим на движење, во рамки на слични тенденции во регионот и Европа.
Двајцата шефови на дипломатии ќе разговараат и за регионалната соработка, како фактор на стабилноста и просперитетот на нашиот регион, како и ЕУ агендата во пресрет на значајните чекори кои и’ претстојат како на Северна Македонија, така и на Србија и целиот регион.