Ова тие го најавија на денешниот 26. „Марш за ангелите“ во Кочани, а причината за ваквата одлука, како што рекоа, се изјавите на адвокати на обвинети во предметот, дека судскиот процес може да трае 10 до 15 години
Родителите и блиските на загинатите во пожарот во т.н. кабаре „Пулс“ во Кочани, што се случи на 16 март, од утре ќе почнат со мирни јавни собири и блокади на кружниот тек кај двојниот мост на улицата „Стево Теодосиевски“ во градот.
Ова тие го најавија од денешниот 26. по ред „Марш за ангелите“ во Кочани, а причината за ваквата одлука, како што рекоа, се изјавите на адвокати на обвинети во предметот, дека судскиот процес може да трае и 10 до 15 години.
„Оваа изјава е срамна и понижувачка за семејствата чии деца ги загубија животите во трагедијата. Таквите зборови звучат како обид да се подготви јавноста за одолговлекување и заборавање. Ние тоа нема да го дозволиме“,
изјави мајка на загинато девојче пред новинарите, пренесе МИА.
Јавните собири и блокадите, како што најавија родителите и блиските на загинатите, ќе траат по еден час секој ден, а ќе се одржуваат во периодот од 15:15 до 16:15 часот.
Болокадите, додадоа тие, ќе траат сѐ додека не започне судскиот процес за пожарот во „Пулс“ во кој загинаа 62 млади лица, а повеќе од 200 беа повредени.
Родителите и блиските на настраданите рекоа и дека бараат да се зголеми капацитетот на судскиот состав со дополнителни судии и судски соработници за да не се одолговлекува процесот поради недостаток на ресурси. Исто така, порачаа дека рочиштата мораат да добијат приоритет и постојано темпо, со цел постапката да тече непречено и без непотребни одложувања. Тие се сомневаат во манипулации или скриено забавување на судскиот процес и бараат јавно и транспарентно следење на сите процесни активности.
„Правдата не смее да се влече. Ќе бидеме тука на кружниот тек, сѐ додека не почне судењето, а за понатаму зависи како ќе се одвиваат работите. Животот на едно дете вреди повеќе од нечии интереси и адвокатски игри“,
порачаа членови на семејства што загубија свои блиски во пожарот во „Пулс“.
Денешниот 26. „Марш за ангелите“ во Кочани, како и претходните, започна од „Паркот на Револуцијата“ каде и заврши. Попатно, петнаесетина минути беше блокиран сообраќајот на кружниот тек пред двојниот мост, токму на местото каде што од утре па натаму се најавуваат јавни собири и блокади.
Инаку, за изјавите на адвокати на обвинети во предметот „Пулс“ реагираше и државниот јавен обвинител Љупчо Коцевски. Во отворено писмо до Адвокатската комора на Република Северна Македонија, Коцевски наведува дека одредени адвокати изнесуваат коментари за обвинението со „Пулс“ без воопшто да се запознаени со содржината на обвинението, на доказниот материјал или планираната динамика на Судот за одржување на рочиштата.
Дополнително, државниот јавен обвинител вели дека одредени адвокати ја коментираат постапката и обвинението како непристрасни правни експерти, без да појаснат дека всушност се бранители на обвинетите кои во основа ги застапуваат интересите на својот клиент.
Од Адвокатската комора денеска преку писмено соопштение рекоа дека до нив сè уште не пристигнало писмото од државниот јавен обивнител. Оттаму велат дека откако ќе го добијат дописот и ќе ги разгледаат наводите во него, ќе излезат со официјално соопштение и став.