Во руските напади во текот на ноќта, како што пренесуваат агенциите, исто така, е погоден и југоисточниот украински регион Запорожје, каде што едно седумгодишно дете е убиено, а најмалку три лица се повредени
Главниот град на Украина рано утрово остана без електрична енергија откако руските сили извршија нов масовен напад на клучната инфраструктура на Киев прекинувајќи го снабдувањето со вода и струја и предизвикувајќи пожар во станбена заграда, јавија светските агенции.
Градоначалникот на Киев, Виталиј Кличко, соопшти дека во нападот се повредени девет лица, од кои пет се пренесени во болница. Како што информира тој, со прекин во снабдувањето со електрична енергија се погодени областите на источниот брег на реката Днепар, која тече низ главниот град на Украина.
Од фотографии што на интернет ги објавија украинските власти можат да се видат станови во пламен и многубројни противпожарни екипи како се обидуваат да се справат со огнот.
Според извештаите, фрагменти од соборени беспилотни летала паднале во неколку делови од градот.
Агенцијата Франс-прес пренесе дека нејзините новинари во Киев слушнале неколку силни експлозии по што дошло до прекин на снабдувањето со електричната енергија во нивните живеалишта во различни области на градот.
„Главниот град на земјата е под непријателски напад со балистички ракети и масовен напад со беспилотни летала“,
соопштиле украинските воздухопловни сили повикувајќи ги луѓето во Киев да останат во засолништа.
Министерката за енергетика на Украина, Свитлана Гринчук, изјави дека руските сили нанесуваат масовен удар врз енергетската мрежа на земјата и дека надлежните ги преземаат сите потребни мерки за да ги минимизираат последиците.
„Штом безбедносните услови дозволат, експертите за енергетика ќе започнат да ги проценуваат последиците од нападот и санација на штетите“,
напиша таа на Фејсбук.
9 людей травмовані внаслідок нічної атаки рф на Київ
— DSNS.GOV.UA (@SESU_UA) October 10, 2025
У кількох районах міста зафіксовано пошкодження житлової забудови та об’єктів цивільної інфраструктури.
У Печерському районі уламки спричинили пожежу в багатоповерхівці. Надзвичайники врятували 20 осіб, 9 — травмовані. pic.twitter.com/3BNk8MN0dz
Москва ги засили воздушните напади врз украинските енергетски објекти и железнички системи во последните недели, што, како што наведува „Гардијан“, е пресликување на сличните кампањи што ги преземаа руските сили претходните три зими оставајќи ги граѓаните на Киев и други градови без греење на ниски температури.
Стравувајќи дека руските сили истрелале хиперсонична ракета „Кинжал“, која е потешка за откривање и пресретнување, Украина утрово ја стави целата земја во состојба на готовност.
Во руските напади во текот на ноќта, како што пренесуваат агенциите, исто така, е погоден и југоисточниот украински регион Запорожје. Тој бил цел на најмалку седум напади со беспилотни летала.
Според шефот на регионалната воена администрација, Иван Федоров, во нападите врз Запорожје загинало седумгодишно дете, додека најмалку три лица биле ранети.
Украинскиот претседател Володимир Зеленски вчера изјави дека Москва се обидува да создаде хаос и да изврши психолошки притисок со нападите врз енергетските објекти и железниците во земјата.
Зеленски изјави дека руските напади оваа година веќе ја оптоваривме украинската гасна инфраструктура и дека повеќе напади би можеле да ја принудат неговата земја да го зголеми увозот на енергенси.
Инаку, Украина, исто така, ги засили своите напади со беспилотни летала и ракети на руска територија, тактика за која Зеленски рече дека покажува „резултати“ и ги зголемува цените на горивата во Русија.
Во понеделникот Украина изврши напад врз електрана во рускиот пограничен регион Белгород, што исто така предизвика прекини во снабдувањето со електрична енергија.
Русија вчера го обвини Киев за прекин на сега нефункционалниот цевковод во близина на фронтовската линија што се користи за транспорт на амонијак во Украина, при што бил ослободен токсичен гас.
Властите во источниот украински регион Донецк, пак, изјавија дека инцидентот не претставува закана за животите на луѓето што живеат во близина.