Оставката што ја бараат од министерот за внатрешни работи е, како што велат, поради очигледниот системски колапс на јавната безбедност и недоволната превенција на насилни инциденти
Социјалдемократскиот сојуз на Македонија (СДСМ) бара политичка одговорност од министерот за внатрешни работи Панче Тошковски. Причина за ваквото барање, како што наведуваат, е оружениот инцидент што се случи денеска во Куманово, а во кој едно лице беше повредено.
„Последниот оружен инцидент во Куманово е најсериозен инцидент во пресрет на локалните избори кој внесува сериозна загриженост за јавниот ред и мир и безбедноста на граѓаните. Се случува тотален распад на безбедносниот систем и фијаско на министерот Панче Тошковски“,
се наведува во соопштението од СДСМ.
Оттаму бараат надлежните институции веднаш да го расчистат случајот и да ја информираат јавноста.
Според СДСМ, престрелките се секојдневие и граѓаните не се чувствуваат безбедно. Ова што се случува во континуитет, велат од СДСМ, е за секаква осуда и недозволиво.
„Македонските улици се претворија во Див Запад“,
се додава во соопштението.
Од партијата искажуваат загриженост оти денеска во Куманово можело да се случи да загине дете додека се враќа од училиште.
Од СДСМ велат дека вакви инциденти не се изолирани и ја покажуваат целосната неспособност на Тошковски и на ВМРО-ДПМНЕ.
„Уште колку луѓе треба да настрадаат, уште колку луѓе треба да бидат убиени за Тошковски конечно да си поднесе оставка?“,
прашуваат од СДСМ.
Оставката што ја бараат од министерот за внатрешни работи е, како што велат, поради очигледниот системски колапс на јавната безбедност и недоволна превенција на насилни инциденти.
„Партизацијата на полицијата и претоварењето во партиски сервис на ДПМНЕ, харањето по партиски штабови и злоупотребата на БЈБ се на директна штета на безбедноста на граѓаните. Тоа ги охрабрува криминалните структури“,
велат од СДСМ.
Денеска, околу 14 часот, едно лице беше повредено на улицата зад зградата на Општина Куманово откако врз него било пукано од возило во движење.
Повредениот е 43-годишникот Зекирија Шаини, вработен на скопската Клиника за пулмологија и носител на советничката листа на ДУИ во Општина Липково.
Повредениот бил пренесен во кумановската болница со четири прострелни работи во пределот на левата подлактица и десното колено. Директорот на Општата болница Куманово, Сашо Стошевски, информира дека мажот е пренесен на скопските клиники, но дека е надвор од животна опасност.